Путин коронавируһу утары охсуһар медиктэргэ эбии төлөбүрдэр тустарынан

Коронавируһу утары охсуһар медиктэргэ ааҕыллар эбии төлөбүрдэр от ыйыгар уонна атырдьах ыйыгар эмиэ төлөнүөхтэрэ. Ол туһунан, Арассыыйа Бэрэсидьиэнэ Владимир Путин видеокэмпириэнсийэҕэ медиктэри кытта көрсүһүүтүгэр эттэ.

edersaas.ru

Кини уопсастыба, дьон-сэргэ эппиэтинэстээхтик сыһыаннаһан уонна быраастар эҥкилэ суох үлэлэринэн эпидемия уҕараан эрэрин билиэтээтэ. Ол эрээри, коронавируһу утары охсуһуу билигин да салҕанарын, дьаҥ куттала билигин да баарын эттэ.

«Өссө икки ый, от ыйыгар уонна атырдьах ыйыгар, бары федеральнай төлөбүрдэри уонна эрэгийиэннэр эбии төлөбүрдэрин оннунан хаалларар оруннаах дии саныыбын», — диэтэ  Владимир Путин. Уоппускаҕа бу төлөбүрдэр учуоттаныахтаахтарын туһунан эттэ.

Итини сэргэ, Путин эпидемия кэмигэр аҕа саастаах кэллиэгэлэрин кытары 15 тыһыынчаттан тахса устудьуон — ординатордар, аспираннар үлэлээбиттэрин бэлиэтээтэ. Бэрэсидьиэн эдэр дьон дьиҥнээх бойобуой сүрэхтэниини ылбыттарын уонна олохторун анаабыт идэлэригэр бэриниилээхтэрин көрдөрөр тургутугу ааспыттарын тоһоҕолоото.

Судаарыстыба баһылыга коронавируһу бохсор үлэҕэ кыттыбыт медик устудьуоннары көҕүлүүр туһунан этии киллэрдэ. Кини миниистирдэр маны хайдах быһыылаахтык оҥоруохха сөбүн быһааралларыгар сорудахтаата.