Бүгүҥҥү уочараттаах брифинигэр дьаҥы бохсууга үлэлэһэр суһал штаб салайааччытын солбуйааччы Ольга Балабкина туох сонуннаах таҕыста?
Ольга Валерьевна бэҕэһээ дойду бэрэсидьиэнэ Владимир Путин хамсыкка анаммыт сүбэ мунньаҕы ыыппытын туһунан кэпсээтэ. Дойду баһылыга сүрүн болҕомтону күһүҥҥү кэмҥэ бэлэмнэниигэ туһаайбыт. Ол курдук, бастакытынан, быһыыны (прививканы) оҥорууга. Күһүн үгэс курдук, кириип ыарыыта турар. Ол дойдуга халлаан эрдэ тымныйар Уһук Илинтэн уонна Хоту дойдуттан саҕаланар. Итинэн сибээстээн, өрөспүүбүлүкэ баһылыга Айсен Николаев быһыы графигын уларытарга – эрдэлэтэргэ эттэ. Онон оҕолор уонна ыалдьар кутталлаах кырдьаҕастар эҥин эрдэ ылыахтара.
Путин, иккиһинэн, диспансеризацияны таарыйбыт. Мэдиссиинэ тэрилтэлэрэ атырдьах ыйын иккис аҥаарыгар диспансеризацияны саҕалыахтара. Онуоха диэри хамсыгы кытта күнүстэри-түүннэри охсуһа сылдьар эмчиттэр кыратык сынньаныахтаахтар. Уонна үһүс боппуруоһу бэрэсидьиэн доруобуйа харыстабылын тэрилтэлэрэ цифровой өҥөнү биэриилэригэр анаабыт. Биһиэхэ “Облачная поликлиника” үлэлээн, 100 тыһыынча нэһилиэнньэни хаппыт. Маннык көрүҥнээх өҥө Арктикаҕа уонна Кэбээйигэ эрэ тиийэ илик. Коронавирус дьаҥын кэмигэр дьоҥҥо олус абыраллаах диэн сыаналаата О.Балабкина.
Бырабыыталыстыба бэрэссэдээтэлин солбуйааччы Ольга Балабкина социальнай тиһиктэргэ хамсыкка сыһыаннаах боппуруостарга дьон сыһыана уларыйбытын, чуолаан, эмчиттэргэ дьон махталын биллэрэр буолбутун эттэ.
Өссө биир түгэн – тиэһи оҥоруу. Өрөспүүбүлүкэ үрдүнэн 300 тыһыынча тест оҥоһуллубут. Ааспыт сууккаҕа — 2595 . Балыыһаҕа сыта киирэр дьон тиэстээһини ааһаллар. Оттон итинник киирээччилэртэн тиэст (тест) ирдиир буоллахтарына, хамсыгы бохсууга биир кэлим кииҥҥэ төлөпүөннээн биллэриҥ диэн сүбэлээтэ.
Дьэ, оттон бүгүҥҥү туругунан балаһыанньа хайдаҕый? Ааспыт сууккаҕа 56 киһи ыалдьыбыт, биир киһи олохтон туораабыт. Ыарыы тарҕаныыта сайыҥҥы кэмҥэ дьон тыаҕа сайылыы, сынньана тахсалларын кытта сибээстээҕин Ольга Валерьевна ыйда. Бүгүҥҥү “хара испииһэккэ “ киирдилэр – Алдан, Амма, Абый, Мэҥэ Хаҥалас, Хаҥалас, Чурапчы. Оттон Дьокуускай – 47. Үгэс курдук ыалдьыбыт дьон ахсааныттан 70 тахса бырыһыанын киин куорат ылар. Үөһээ Бүлүүгэ, Ньурбаҕа эмиэ балаһыанньа уустук. Онон эмчиттэр ыарыы салгыы тарҕамматын, ыалдьыбыт дьон үтүөрэллэрин туһугар сыралаһаллар.
Бэлэмнээтэ Женни СТРЮКОВА
Хаартыска: О.Балабкина