Оҕо көмүскэлин күнүгэр Владимир Путин элбэх оҕолоох ыалларга “Төрөппүт Албан аата” диэн уордьаны туттарда. Олор истэригэр Нерюнгриттан 14 оҕолоох Юдинцевтар бааллар.
Араас регионнартан элбэх оҕолоох ыаллары наҕараадалаатылар. Ол курдук, Хакасияттан 12 оҕолоох Шутылевтар, Москваттан 12 оҕолоох Ильяшенколар, Кургантан 10 оҕолоох Макеевтар, Калининград уобалаһыттан 10 оҕолоох Лусталар, Ставропольскай кыраайтан 9 оҕолоох Несмияновтар кэлбиттэр, Адыгеяттан Шеудженнар, Мордовияттан Урсовтар 7-лии оҕолоохтор.
Наҕараадаламмыт дьиэ кэргэттэр Кириэмил уонна куорат устун экскурсиялаатылар, бэрэсидьиэни кытары көрүстүлэр. Кинилэргэ уордьаны, Бочуотунай грамотаны уонна 100 тыһ. солк. бириэмийэни туттардылар. Маннык ыаллар дьиэ кэргэн институтун бөҕөргөтөргө, духуобунай уонна сиэр-майгы өттүнэн оҕону иитиигэ, үөрэтиигэ, сайыннарыыга атыттарга холобур буолаллар.
Юдинцевтар Нерюнгри оройуонун Иенгра бөһүөлэгэр олороллор. Татьяна уонна Павел Уссурийскайга билсиһэн, ыал буолан баран, Саха сиригэр 1997 сыллаахха кэлбиттэр, Иенграны сөбүлээн олохсуйбуттар. Павел Васильевич оскуола-интэринээккэ электригынан үлэлиир. Ийэлэрэ оҕолорун көрөн олорор. Улахан кыргыттара Галина уонна Елена устудьуоннар, Сергей, Екатерина, Тимофей, Владимир, Александр, Людмила, Евгений уонна Ирина – оскуола үөрэнээччилэрэ. Игирэлэр Марк уонна Маргарита 6 саастаахтар, ааҕалларын сөбүлүүллэр. Кыралара Наташа уонна Анита (2 саастаах) дьиэлэригэр ийэлэрин кытары олороллор.
2011 сыллаахха Юдинцевтар СӨ бырабыыталыстыбатын гранын ылан, икки мэндиэмэннээх дьиэ туттубуттара. 2012 сыллаахха кинилэргэ УАЗ массыына биэрбиттэрэ. Онтон 2016 сыллаахха Татьяна Владимировна 14 оҕону төрөппүт ийэ быһыытынан, СӨ бэрэсидьиэнин бириэмийэтинэн наҕараадаламмыта. Кини бэйэтэ эмиэ 11 оҕолоох ыал кыыһа. Оттон Павел 12 бииргэ төрөөбүттээх. Улахан дьиэ кэргэн бэйэлэрэ хаһаайыстыбалаахтар, оҕолорун үлэнэн иитэллэр. Сэттэ оҕолоро музыкальнай оскуолаҕа дьарыктаналлар. Кыралыын улаханныын бары да ыллыылларын сөбүлүүллэр, дьиэлэригэр музыкальнай оркестр тэрийбиттэрэ.
Юдинцевтар Кириэмилгэ кинилэри олус үчүгэйдик көрсүбүттэриттэн, куорат устун күүлэйдэппиттэриттэн астыммыттар. Ордук оҕолорго үйэлэрин тухары умнуллубат өйдөбүл буолбут. Кинилэр дойду бэрэсидьиэнигэр эбэҥкилэр тустарынан кинигэни, биир дойдулаахтарын суруктарын, оҕуруо киэргэли уонна кедр ыарҕатын лабаатын бэлэхтээтилэр. Бу үүнээйи кыһыннары-сайыннары күөх турар, сиргэ тэлгэнэн үүнэр. Хоту дойдуга олорор дьон тулуурдарын, дьулуурдарын, олоххо тардыһыыларын кэрэһилиир.
Ыспыраапка
“Төрөппүт Албан аата” уордьан
Уордьан 2008 сыллаахха олохтоммута, аан бастаан 2009 сыл тохсунньу 1 күнүгэр туттарбыттара. Урут, өрөбөлүүссүйэ иннинэ Сибэтиэй Ольга анал бэлиэтин оҕону иитиигэ үтүөлэрин иһин туттараллара. “Төрөппүт Албан аата” уордьаны бу бэлиэни үтүгүннэрэн оҥорбуттар. Оттон сэбиэскэй кэмҥэ элбэх оҕолоох ийэлэри “Ийэ килбиэнэ”, “Ийэ Албан аата”мэтээллэринэн, “Дьоруой ийэ” ааты иҥэрэн наҕараадалыыллара.
Ангелина ВАСИЛЬЕВА, “Саха сирэ” хаһыат, edersaas.ru