Судаарыстыба баһылыга Владимир Путин бэҕэһээ, тохсунньу 31 күнүгэр, “Ново-Огареваҕа” буолбут олимпиецтары кытта көрсүһүүтүгэр дойду кинилэри Пхенчханнааҕы Оонньуулар тула үөскээбит быһыыттан-майгыттан кыайан көмүскээбэтэҕин иһин бырастыы гыналларыгар көрдөстө.
Арассыыйа бэрэсидьиэнэ спорду киниэхэ туора сабыытыйалары, көстүүлэри, тастыҥ сабыдыалы, бэлиитикэни кытта бөрөөһүн, булкуйуу ордук ыараханнык ылынылларын ыйан туран, маннык быһыыга-майгыга көрдөрүүнү ситиһэр уустугун бэлиэтээтэ.
Олимпиецтарга туһаайан Владимир Путин Арассыыйа спорт ыраас буоларын иһин туруулаһара, туруулаһыаҕа, өйүөҕэ, бу туһунан эһиэхэ, спорду сэҥээрээччилэргэ, ханнык да саарбахтааһын суох буолуохтаах диэтэ. Уонна, эһиэхэ мөлүйүөнүнэн дьон ыалдьаллар, эһиги кыайыытыгар эрэнэллэр диэн туран, мөкүнү ыатарбакка, санаабакка, бары өйү-санааны күрэстэһиигэ туһаайарга ыҥырда.
Бэрэсидьиэн салгыы Арассыыйа бэйэтин көтүтүүлэрин, алҕастарын, аныгы спорка тутаах суолларга болҕомтотун ситэ уурбатаҕын билинэрин, ону кытта спорт аан дойдутааҕы тэрилтэлэрэ сорох дойдулар судаарыстыбаннай тэрилтэлэригэр кубулуйбаттарыгар эрэнэрин эттэ. Ону кытта Владимир Путин Олимпиадаттан туоратыллыбыт спортсменнары былаас өйүөҕүн иһитиннэрдэ.
Роман Попов, “Саха сирэ” хаһыат