Путин: Арассыыйаҕа коронавирус балаһыанньата бэрдэ суох өттүгэр уларыйар

НОВО-ОГАРЕВО, Муус устар 13 күнэ. Маныаха бэрэсидьиэн пандемияны бохсууга урутаан иһэр дьаһаллары ылыналларын бэлиэтээтэ.

Арассыыйа Бэрэсидьиэнэ Владимир Путин дойдуга коронавирус балаһыанньата бөрүкүтэ суох өттүгэр уларыйарын эттэ.
“Күн ахсын балаһыанньа уларыйа турарын көрөбүт уонна, хомойуох иһин, ыалдьыбыт дьон ахсаана элбии турар. Ыарыы ыараханнык ааһара элбээтэ”, — диэтэ судаарыстыба баһылыга мунньахха.
Кини этэринэн, дойду былаастара коронавируска сыһыаннаах уустук уонна олус уустук сценарийдары болҕомтоҕо ылыахтаахтар. “Итини бэйэбит дьайыыларбытын уонна стратегиябытын суһаллык чопчулуур туһугар уонна, туох-ханнык иннинэ, гражданнарга мэдиссиинэ көмөтүн оҥорууга”, — диэтэ дойду баһылыга.
Маныаха кини пандемияны бохсууга урутуур миэрэлэри ылына сатыылларын бэлиэтээтэ. “Салгыы даҕаны урутаан дьайар туһугар, төһө да балаһыанньа тупсан барбатын үрдүнэн, билиҥҥитэ итинник хамсанар наада, — биһиэхэ үчүгэй, идэтийбит дьон сабаҕалааһыннара ирдэнэр”, — диэтэ бэрэсидьиэн.
Путин бырабыыталыстыбаттан коронавирус балаһыанньата сайдыытын сабаҕалааһыны ирдээтэ. Бу туһунан судаарыстыба баһылыгар күн аайы дакылааттыахтаахтар.
Кини балаһыанньа хайдах сайдан иһэрин туһунан идэтийбит сабаҕалааһын наадатын бэлиэтээтэ. “Уонна орто болдьохтоох уонна уһун болдьохтоох эрэ буолбакка, чугастааҕы 3,7, уон күн туһунан”, — диэтэ бэрэсидьиэн.
Кини бырабыыталыстыбаҕа дьиҥнээх суоһуур балаһыанньаҕа олоҕуран, маннык сабаҕалааһыны оҥорорго уонна куруук саҥардан иһэргэ сорудахтаата. Путин: “Миэхэ хас суукка аайы дакылааттыахтааххыт”, — диэтэ.
Ону сэргэ, коронаврус пандемиятынан сибээстээн, балыыһалар сүгэр ноҕоруускаларын көдьүүстээхтик тыырыыны ирдээтэ.

Бэлэмнээтэ Женни СТРЮКОВА, “Саха сирэ” хаһыат
Хаартыска: интэриниэттэн