Дьокуускай бүгүн “АЛРОСА” дьиэтин саалатыгар Владимир Путин ыстааба арылынна. Ыстаабы Владимир Путин итэҕэллээх дьоннорунан анаммыт “Анаабыр алмаастара” генеральнай дириэктэрэ Павел Маринычев уонна Саха эстрадатын дириэктэрэ Алексей Егоров салайыахтара. Бу күннэргэ өссө үһүс киһи аата биллиэҕэ.
Владимир Путин ыстаабын үс киһи салайар: Д.Рогачев аатынан медицина киинин дириэктэрэ, Оҕолор гематологтарын уонна онкологтарын национальнай уопсастыбатын салайааччыта, медицинскай наука доктора, профессор, Россия наукатын академиятын академига Александр Румянцев, талааннаах оҕолор “Сириус” диэн кииннэрин салайааччыта, социологическай наука кандидата Елена Шмелева уонна “КамАЗ” генеральнай дириэктэрэ (автособуоту 2002 с. салайар, бу иннинэ Татарстаҥҥа премьер-миниистир солбуйааччынан үлэлээбитэ) Сергей Когогин. Ыстаап пресс-сэкирэтээринэн ВГТРК сырдатааччыта, “Крым. Путь на родину” киинэ ааптара Андрей Кондрашов анаммыта.
Регионнарга тэриллибит ыстааптар дьону-сэргэни кытары үлэлэһиигэ сүрүн болҕомтолорун ууруохтаахтар. Бу туһунан Павел Маринычев: “Дьокуускайы таһынан улуустарга эмиэ үлэни күүскэ ыытыахпыт. Хас биирдии киһи кэлэн ыстаапка мунаарар боппуруостарын ыйытыан сөп”, — диэн бэлиэтиир.
Ыстаап бэрэссэдээтэллэрин солбуйааччыларынан Норуот фронун Саха сиринээҕи салаатын салайааччыта Валерий Лютай, “Биир ньыгыл Россия” партия Саха сиринээҕи отделениетын сэкирэтээрэ Александр Ноговицын уонна Россияҕа Саха сирин боломуочуйалаах бэрэстэбиитэлэ Юрий Куприянов ананнылар. Валерий Лютай нэһилиэннэьэни кытары баһычча үлэлэһиэҕэ. Ону сэргэ уопсастыбаннай түмсүүлэри кытары “Биир ньыгыл Россия” партия президиумун салайааччыта Дмитрий Никифоров, Экологоия, туризм уонна агротехнологическай үөрэхтээһин киинин салайааччыта Гавриил Семенов, Ил Түмэн депутата Александр Сусоев үлэлэһиэхтэрэ.
Ыстаап өссө биир салайааччыта Алексей Егоров: “Саха сирэ урут-уруккуттан быыбарга көхтөөхтүк кыттар. Бу да сырыыга оннук буолуо дии саныыбын”, — диэн этэн туран, кэлэр быыбарга көхтөөхтүк кыттарга ыҥырда.
Ыспыраапка: Билигин регионнарынан кандидаттар туһаларыгар илии баттааһынын хомуйуу бара турар. Саха сиригэр Владимир Путины таһынан “Яблоко” партияттан турбут Григрий Явлинскай уонна “Партия роста” кандидата Борисов Титов куолас хомуйа сылдьаллар.
Аграфена КУЗЬМИНА, “Саха сирэ” хаһыат, edersaas.ru.