Путин Уопсастыбаннай палаата саҥа састаабыгар киирэргэ 40 хандьыдааты ааттаата
Бэрэсидьиэн судаарыстыба уонна уопсастыба иннигэр уһулуччу өҥөлөөх дьонтон хандьыдааттары быһаарда.
Арассыыйа бэрэсидьиэнэ Владимир Путин 40 хандьыдааты быһаарда уонна кинилэр РФ Уопсастыбаннай палаататын саҥа састаабыгар киирэллэригэр этии киллэрдэ. Бу туһунан Кириэмил саайтыгар иһитиннэрдилэр.
“Бэрэсидьиэн судаарыстыба уонна уопсастыба иннигэр уһулуччу өҥөлөөх Арассыыйа 40 гражданын хандьыдааттар быһыытынан быһаарда уонна кинилэри Арассыыйа Федерациятын Уопсастыбаннай палаататын састаабыгар киирэллэригэр ыҥырда”, — диэн иһитиннэриигэ этиллэр.
Уопсастыбаннай палаата туһунан сокуоҥҥа олоҕуран, бэрэсидьиэн этиитинэн Уопсастыбаннай палаата саҥа састаабын торумнааһын процедурата саҕаламмытын туоһулуур.
Хандьыдаат быһыытынан ааттара этиллибит дьонтон аҥаардарын кэриҥэ идэтийбит уонна айар сойуустартан, үлэни биэрээччилэр холбоһуктарыттан уонна ассоциациялартан, анал идэлээх дьон түмсүүлэриттэн, ону тэҥэ идэтийбит уонна социальнай бөлөхтөр интэриэстэрин көрдөрүүгэ уонна көмүскээһиҥҥэ анаан тэриллибит атын кэмиэрчэскэйэ суох тэрилтэлэртэн тураллар.
РФ Уопсастыбаннай палаатата – дьону-сэргэни судаарыстыбаннай былаас уорганнарын уонна олохтоох бэйэни салайыыны кытта хардарыта сибээстиир сүбэлиир уорган. 2005 сылтан үлэлиир, РФ олохтоохторо, уопсастыбаннай түмсүүлэр уонна кэмиэрчэскэйэ суох тэрилтэлэр баҕа өттүлэринэн кыттыыларынан олоҕурар. Састаап боломуочуйатын болдьоҕо – үс сыл, ахсаана – 168 чилиэннээх (40 – бэрэсидьиэн кубуотатынан, 85 – РФ субъектарын уопсастыбаннай палааталарыттан, 43 – Бүтүн Арассыыйатааҕы уопсастыбаннай түмсүүлэртэн).
Уопсастыбананй палаата РФ гражданнарын, уопсастыбаннай түмсүүлэрин уонна тэрилтэлэрин, судаарыстыбаннай былаас уорганнарын интэриэстэрин экэнэмиичэскэй уонна социальнай сайдыы дьоһун суолталаах боппуруостарын, национальнай куттал суох буолуутун, РФ гражданнарын бырааптарын уонна көҥүллэрин көмүскээһини, Конституция тутулун уонна гражданскай уопсастыба сайдыытын демократическай бириинсиптэрин сөбүлэһиннэриини хааччыйар аналлаах.
Михаил Метцель/ТАСС
Бэлэмнээтэ Женни Стрюкова.