Саха сиригэр кимнээх киинэ уһула сылдьалларый? Ханна-ханна сылдьыбыттарый? Киинэ устааччылары туох интэриэһиргэппитий? Ол туһунан манна ааҕыҥ.
Саха АССР төрүттэммитэ 100 сылын көрсө бигэргэммит былаанынан тэрээһин үлэ бөҕө ыытыллар. Итилэртэн биирдэстэринэн ВГТРК федеральнай ханаала, “Моя планета” телеханаал “Пути великих свершений” документальнай киинэни Саха сирин өҥүрүк куйааһыттан иҥнибэккэ уста сылдьар. Ол курдук, 52 мүнүүтэ хронометражтаах бастакы киинэни 1632 сылтан саҕалаан Сибиир уонна Уһук Илин нуучча бастакы айанньыттарын саҥа сири арыйыыларын көрдөрүөхтэрэ.
Онон 7 киһилээх устар бөлөх “Пути великих свершений” бырайыак Саха сирин Бырабыыталыстыбатын Бэрэссэдээтэлин солбуйааччы, Уһук Илин ФУо Саха сирин Бастайааннай бэрэстэбиитэлэ Георгий Никонов салалтатынан киинэ бастакы түһүмэҕин уһула сылдьар.
Анал былааҥҥа олоҕуран, устааччылар Дьокуускайга үлэлээн баран, Өлүөхүмэ оройуонугар Олоҥхо ыһыаҕын кэрэ түгэннэрин үйэтиттилэр. Айар куттаах дьон Аанньаах хочотун кэрэ көстүүтүттэн олус дуоһуйдулар, Олоҥхо ыһыаҕа киэҥ таһымнааҕыттан сөхтүлэр-махтайдылар. Өлүөхүмэҕэ айар бөлөҕү Т.Н.Пяткина салайда.
Устар бөлөххө Александр Меньшов, Александр Фомичев, Евгений Писаренко, Максим Телятников, Юрий Коваленко, Александра Боровикова үлэлээтилэр. Киинэ режиссера – Элеонора Тухарели.
Киинэҕэ СӨ Ил Дархана Айсен Николаев этиитэ дьоһун миэстэни ылыаҕа. Кини этэр тыла-өһө урукку уонна билиҥҥи кэми ситимнииир.
Маны сэргэ устар бөлөх Таатта, Уус Алдан оройуонугар эмиэ таһаарыылаахтык үлэлээтилэр. Онно улуустар баһылыктара Михаил Соров, Алексей Федотов төһүү күүс буоллулар. Уус Алдаҥҥа “Доҕордоһуу” мусуойугар сырыттылар. Бүгүн Дьокуускай куорат мусуойун дириэктэрэ Е.А.Строгованы кытта сэргэх кэпсэтии буолла.
Култуура нэһилиэстибэтин эбийиэктэрин харыстааһыҥҥа департаменын салайааччыта Николай Макаров, Афанасий Мигалкин спикер буолбуттара, аатырбыт “Тыгын Дархан” киинэ режиссера Никита Аржаков эмиэ интервью биэрбитэ.
Сарсын Хаҥалас улууһугар СӨ Ил Дарханын уонна СӨ Бырабыыталыстыбатын Дьаһалтатын салайааччы Афанасий Владимиров кыттыаҕа. СӨ норуодунай суруйааччыта Павел Харитоновы-Ойукуну устуохтара. Еланкаҕа “Дьаамсыктар тиэргэннэригэр” таарыйыахтара. Хаҥалас улууһугар өссө хас да сиргэ сылдьаллара күүтүллэр. Быһата, ханна да сырытталлар, киинэни устааччылар устуоруйа дириҥ быыһын сэгэтиэхтэрэ, уруккуну уонна билиҥҥини сонуннук көрдөрүөхтэрэ. Бу киинэ 2022 сыл саҥатыгар тахсара күүтүллэр.
Уһук Илин федеральнай уокуругар Саха сирин Бастайааннай бэрэстэбиитэлистибэтин иһитиннэриитинэн
Бэлэмнээтэ Женни Стрюкова
Хаартыска: тустаах бэрэстэбиитэлистибэ тиксэрдэ.