Бу күннэргэ РФ Бэрэсидьиэнэ Владимир Путиҥҥа Арассыыйа үгүс олохтооҕо биэрбит ыйытыыта кыайан тиийбэтэҕиттэн хомойбута чахчы.
Биллэн турар, ыйытыылара эфиргэ тахсыбыт дьон сонно бэйэлэрин эрэгийиэннэригэр аатыра түстүлэр. Дьиҥэр, ыйытыыны биэрии лотереяҕа тэҥнээх курдук — кимиэхэ дьоллоох түгэн тосхойбутунан.
Мин РФ Бэрисидьиэнэ Владимир Путин быһа эфиргэ тахсыан иннинэ хас да киһиттэн: «Эн Арассыыйа бэрэсидьиэниттэн тугу ыйытыаҥ этэй?» — диэн ыйытылаһа сылдьыбыппар, дьонум бу курдук хоруйдаабыттара.
Алексей ВИНОКУРОВ, Нам улууһунааҕы Бизнес-инкубатор дириэктэрэ:
— Арассыыйа таһымыгар дьоҕус бизнескэ тустаах инвестиционнай бырагыраама наада. Ол тосхолго олоҕуран, предпринимателлэргэ икки сыл уһатыылаах 6-7 % иэс (займ) бэрилиннэр, урбаанньыттарга бэрт дьоһуннаах өйөбүлүнэн буолуо этэ. Биһиэхэ, Саха сиригэр, министиэристибэбит бу боппуруоһу олоххо киллэрэргэ үлэлэһэн эрэр. Бырагыраама Арассыыйатааҕы таһымнаннаҕына, суолтата ордук үрдүөҕэ. Мин РФ Бэрэсидьиэнэ Владимир Путинтан бу боппуруоска туох санаалааҕын ыйытыам этэ.
Евдокия ДЬЯЧКОВСКАЯ, СӨ Ыраах айан суоппардарын ассоциациятын салайааччыта:
— РФ Уһук Илини сайыннарыы уонна Бырамыысыланнас уонна эргиэн министиэристибэлэрин нөҥүө Арассыыйа үрдүнэн пассажирдары уонна курууһу тиэйэр айан массыыналарын саҥардыыга үбүлээһин көрүллэр. Ирдэбил быһыытынан, массыына 5-6 сыл сүүрүөхтээх. Онон сотору кэминэн Дьокуускай к. дьону тиэйэр оптуобустары саҥардыахтара. Курууһу тиэйэр массыыналарга эмиэ оннук саҥардыы ыытыллыахтаах да, сүрүннээн суол оҥорор анал тиэхиньикэни эрэ уларыталлар. Оттон Хоту сир, Арктика саамай тыйыс усулуобуйатыгар үлэлиир, норуот хаһаайыстыбатын табаарын, таһаҕаһын тиэйэр ыраах айан суоппардарын массыыналара болҕомтоҕо ылыллыбаттар. 1993 сыллаах массыыналарга үлэлиир ыраах айан суоппардара бааллар. Ол иһин, бу тирээн турар кыһалҕаны анаан туруорса сылдьабын. Бырабыытылыстыбаҕа суруйбут суругум СӨ Инвестиция сайдыытын уонна предпринимательство министиэристибэтигэр барбыт. Бу күннэргэ суругум ханна тиийбитин билсэн баран, дьыалам оннуттан хамсыа суох буоллаҕына, бу боппуруоһу РФ Бэрэсидьиэнигэр Владимир Путиҥҥа туруорсуом.
Петр ТАРАСОВ, “Чурапчы улууһа” МТ ыччат уонна дьиэ кэргэн бэлиитикэтин отделын исписэлииһэ:
— Үөрэхтэрин саҥа бүтэрбит ыччаттартан үлэ ыстааһын көрдүүр буоланнар, үгүс эдэр дьону кинилэр талан ылбыт идэлэриттэн тэйитэн эрэллэр. Ол да иһин, билигин ыччаттар фрилансер — көҥүл сылдьан үлэлиир хайысханы тобуллулар. Онон сотору кэминэн оскуоланы бүтэрээт, салгыы үөрэммэккэ, идэ ыларга дьулуспакка, эдэр дьон көҥүл сылдьан үлэлиир буолуохтара. Мин РФ Бэрэсидьиэнэ Владимир Путинтан үөрэҕи саҥа бүтэрбит ыччаттан үлэ ыстааһын ирдээбэттэрин курдук ыйаах таһаарыаххын сөп дуо диэн ыйытыам этэ.
Бу дьонтон СӨ Ыраах айан суоппардарын ассоциациятын салайааччыта Евдокия Дьячковская РФ Бэрэсидьиэнэ Владимир Путинтан ыйытыахтаах боппуруоһун быһа сибээскэ эппиэттээх дьоҥҥо ыыппыт. Маны таһынан, «баҕар, төлөпүөнүнэн быһа сибээскэ тахсан хаалыам» диэн, хаста да эрийэ сылдьыбыт да, кыаллыбатах. Арай, Ваганов оннугар Евдокия Дьячковская бэйэтин боппуруоһун биэрбит буоллун? Ыраах айан суоппардарыгар болҕомто тута туһаайыллыа этэ! Евдокия Кимовна санаатын түһэрбэт. Бу ый 25 күнүгэр Сочига ыытыллар Арассыыйа Автотранспортнай сойууһун үс күннээх 16-с сийиэһигэр кытта барыахтаах. Онно бу боппуруоһу хайаан да туруорсар санаалаах.
РФ Бэрэсидьиэнэ Владимир Путин эрэгийиэннэр салайааччыларын кытта көрсөрүгэр быһа эфиргэ киирбит боппуруостары мунньар от күөҕэ паапкаттан саҕалыыр эбит. Онно баар дьон ыйытыытын хайаан да эрэгийэн баһылыга быһаарыахтаах. Онон Евдокия Дьячковская ыйытыыта болҕомтоҕо ылыллан, от күөҕэ паапкаҕа киирбитэ чахчы.
Артика улуустарыгар саамай тымныы кэмҥэ норуот хаһаайыстыбатын табаарын, таһаҕаһын тиэйэр ыраах айан суоппардарын саамай сытыы боппуруостара сөптөөхтүк быһаарылларыгар эрэнэбит.
Елена ПОТОЦКАЯ, «Саха сирэ» хаһыат, edersaas.ru