Арассыыйаҕа чэпчэтиилээх сынньалаҥ туурдарын атыылааһын атырдьах ыйын 25 күнүттэн саҕаланна. Бу туурдартан “кэшбек” харчытын төнүннэриэххэ сөп. Аахсыйа балаҕан ыйын 10 күнүгэр диэри ыытыллар.
Маннык айаҥҥа Арассыыйа ханнык баҕарар эрэгийиэнигэр барыахха сөп. Айан алтынньы 1 күнүттэн ахсынньы 25 күнүгэр диэри, круиз – балаҕан ыйын 1 күнүттэн навигация тохтуор диэри буолуохтаах.
Айан төлөбүрүн 20%-нын (муҥутаан 20 тыһыынча солкуобайга диэри) төнүннэрэллэр. Бырагыраама ирдэбилинэн, айан уһуна 3 күнтэн аҕыйаҕа суох уонна төлөбүр «Мир»“каартанан төлөммүт буолуохтаах. Манна путевка сыаната эрэ буолбакка, гостиницаҕа түһүү эмиэ киирэр.
Владимир Путин сорудаҕынан, Уһук Илин эрэгийиэнигэр айанныырга, бырагыраамаҕа кыттар гостиницаҕа түһэргэ “кэшбек” суумата икки төгүл улаатар — 20% уонна 40 тыһыынча солкуобай буолар.
Күһүн айанныыр туспа кэрэхсэбиллээх – гостиницаларга миэстэ элбэх, киһи аҕыйах буолар, сыана чэпчиир. Санаторийдарга баран доруобуйаны бөҕөргөтүөххэ, хайалаах сирдэргэ хайыһардыахха, соҕуруу баран, сайыны уһатыахха сөп. Владивостокка, Сахалиҥҥа, Камчаткаҕа, Хабаровскайга баран, муора аһын амсайан, ураты айылҕатыгар сынньанан кэлиэххэ сөп.
“Ростуризм” билгэлииринэн, бу бырагырааманан быйыл 600 тыһыынча киһи туһаныахтаах. Бу күһүн 3 миллиард солкуобайы көрдүлэр. Өскөтүн аахсыйа бүтэ илигинэ, бу суумаҕа туурдары атыылаһан бүтэрдэхтэринэ, “кэшбек” бырагыраамата болдьоҕун иннинэ тохтуур.
Арассыыйа иһинэн “кэшбектээх” туурдар бырагыраамалара 2020 сылтан үлэлээн барбыта. Бу кэмтэн 4,3 мөлүйүөн киһи туһанна. 81 миллиард солкуобайдаах туурдартан 15,5 миллиард солкуобайы дьоҥҥо төнүннэрдилэр.
Ангелина Васильева, “Саха сирэ” хаһыат, edersaas.ru
Хаартыска: объясняем.рф