Арассыыйа Бырабыыталыстыбата «Пушкинскай каарта» бырагыраама усулуобуйаларын кэҥэттэ. Ол курдук, 14-22 саастаах эдэр дьон судаарыстыба суотугар култуурунай тэрээһиннэргэ сылдьалларыгар туһанар каарталарын номинала тохсунньу 1 күнүттэн үс тыһыынчаттан биэс тыһыынча солкуобайга тиийэ улаатта. Маны таһынан, олунньу 1 күнүттэн тэрээһин испииһэгэ эмиэ кэҥээтэ диэн кабмин саайтыгар суруйаллар.
Онон кэлэр ыйтан «Пушкинскай каартаны» тыйаатырдарга, мусуойдарга уонна кэнсиэртиир саалаларга эрэ буолбакка, аны киинэ тыйаатырдарыгар, чуолаан РФ Култуура министиэристибэтин уонна Киинэ пуондатын өйөбүлүнэн уһуллубут киинэлэргэ сылдьарга туһаныахха сөп буолла. Сыл иһигэр киинэ тыйаатырдарыгар сылдьарга тустаах каартанан икки тыһыынча солкуобайга тиийэ барыахха сөп.
Бу быһаарыныыны Михаил Мишустин ааспыт сыл ахсынньытыгар кинематография сайдыытын мунньаҕар иһитиннэрбитэ.
«Пушкинскай каарта» диэн ыччат култуурунай тэрээһиннэргэ судаарыстыба суотугар сылдьарыгар анаан оҥоһуллубут баан каартата буолар. Бу бырагыраама 2021 сыллаахха Арассыыйа Бэрэсидиьэнэ көҕүлээн олоххо киирбит. Баара-суоҕа түөрт ый иһигэр каартанан 3,7 мөлүйүөн киһи туттубута, 2 миллиардтан тахсан сокуобайга билиэт атыылаһыллыбыта биллэр.
Каартаны хантан, хайдах ылар, туһанар туһунан сиһилии манна ааҕыҥ.