Бүгүн «НИКА» бастыҥ киинэлэргэ туттарар Арассыыйатааҕы бириэмийэ номинаннара билиннилэр. Бастыҥнар истэригэр Саха сиригэр уһуллубут «Пугало» киинэ үс номинацияҕа киирдэ.
«Ника» бириэмийэни 1987 сылтан туттараллар. Былырыын сыстыганнаах дьаҥ туран, бириэмийэни туттарыыны быйылгыга көһөрбүттэрэ.
Бу куонкурус бастыҥ наҕараадатынан «Лучший игровой фильм» диэн номинация буолар. Манна Андрей Зайцев «Блокадный дневник», Филипп Юрьев «Китобой», Оксана Карас «Доктор Лиза», Андрей Кончаловскай «Дорогие товарищи» уонна Дмитрий Давыдов «Пугало» киинэлэрэ испииһэккэ киирдилэр.
«Пугало» маны таһынан «Режиссер бастыҥ үлэтэ» уонна «Дьахтар бастыҥ оруола» номинацияларга эмиэ күрэхтэһэр. Режиссер үлэтигэр Дмитрий Давыдов Андрей Зайцев уонна Андрей Кончаловскай курдук биллэр киинэ устааччылары кытта биир кэккэҕэ турда. Оттон Валентина Романова-Чыскыырай Чулпан Хаматованы, Юлия Высоцкая, Наталья Павленкованы кытта илин-кэлин түсүһэр.
«Ника» бириэмийэ муус устар 25 күнүгэр «Оскар» бириэмийэни кытта биир күҥҥэ туттарыллыаҕа.
edersaas.ru