Сэтинньи 26 күнүттэн А.С.Пушкин аатынан Псковтааҕы драма академическай тыйаатырыгар «Потапов-фест» диэн биһиги биир дойдулаахпыт, талааннаах режиссер, СӨ искусствотын үтүөлээх диэйэтэлэ Сергей Потапов айар үлэтигэр анаммыт бэстибээл ыытыллыаҕа.
Бэстибээли Псковтааҕы драма тыйаатыра уонна СӨ Култуураҕа уонна духуобунай сайдыыга министиэристибэтэ көҕүлээн ыыталлар. Псковтааҕы тыйаатыр хамаандата Сергей Потавпов айар үлэтин кэтээн көрөн баран, «Потапов-фест» бэстибээли тэрийэргэ сананна.
Бырагыраамаҕа Арассыыйа араас эрэгийиэннэрин тыйаатырдарын испэктээктэрэ, Сергей Потапов киинэлэрин ретроспективата киирдэ. Итиэннэ Сергей Потапов туруорбут Альметьевскай татарскай тыйаатыр «Та, которую не ждали» испэктээгин көрдөрүөҕэ, Псковтааҕы тыйаатыр «Зойкина квартира» испэктээги сүрэхтиэҕэ.
Биһиги өрөспүүбүлүкэбититтэн Хотугу аҕыйах ахсааннаах норуоттар тыйаатырдара Семен Ермолаев пьесатынан «Һуума» испэктээги көрдөрүөҕэ.