Бүлүү улууһун Сосновка сэлиэнньэтигэр 150 миэстэлээх, 3 этээстээх, Кэт Марсден аатынан Бүлүүтээҕи психоневрологическай интэринээт-дьиэ тутуллан, бу күннэргэ үлэҕэ киирдэ. Бу үөрүүлээх, өрөспүүбүлүкэ социальнай эйгэтигэр улахан суолталаах түгэнинэн РФ вице-премьера Ольга Голикова эҕэрдэлээтэ. Кини «Демография» национальнай бырайыак үлэтэ кэҥээн иһэрин бэлиэтээтэ.
Үөрүүлээх аһыллыыга СӨ бырабыыталыстыбатын бэрэссэдээтэлин солбуйааччы Ольга Балабкина кыттыыны ылла. Маны тэҥэ, саҥа дьиэ тэлгэһэтигэр мас олордуутун сиэрэ-туома буолла.
— Аныгы үйэҕэ социальнай тэрилтэлэр материальнай-тэхиниичэскэй хааччыллыылара бөҕөргөөн иһэрэ ыытыллар бэлиитикэ көстүүтэ буолар. Доруобуйаларыгар хааччахтаах дьоҥҥо бары усулуобуйа тэриллэрэ, көрүү-истии өҥөтө тупсара үөрүүлээх, — диэн үлэ, социальнай сайдыы миниистирэ Елена Волкова эттэ.
Манна уруһуйдуурга, көмпүүтэргэ үөрэтэр, эмтиир физкультура, психолог хосторо баар буолуохтара. Киэҥ-куоҥ остолобуой, үлэ мастарыскыайа, спортивнай, аактабай саалалар, эмчиттэр хосторо, сынньанар, анал утуйар хостор, о.д.а. бааллар. Саҥа миэбэлинэн, анал тэриллэринэн хааччыллар. Онон доруобуйаларыгар хааччахтаах дьоҥҥо тыа сиригэр бэртээхэй усулуобуйа олохтонно.
Өрөспүүбүлүкэҕэ улахан суолталаах эбийиэги “Кинг-95” тэрилтэ бэдэрээттэһэн, “Демография” Национальнай бырайыак чэрчитинэн, “Аҕам саастаах көлүөнэ” федеральнай бырайыак үбүнэн тутта. Тутуу уопсай сыаната – 531,8 мөлүйүөн солкуобай, ол иһигэр, федеральнай бүддьүөттэн – 500,7 мөлүйүөн солкуобай туһаныллыбыт.
Ангелина Васильева, «Саха сирэ» хаһыат, edersaas.ru
Хаартыска: sakhagov.ru