Психологическай тургутук: Эн лидергин дуо?

Ааптар: Эдэр саас

29.09.2025

Бөлөххө киир:

Хаартыска: Оҥоһуу өй

Лидер диэн дуоһунас буолбатах. Сорохтор айылҕаттан дьону батыһыннарар дьоҕурдаахтар, сорохтор бу үөрүйэҕи олохторун устата сайыннараллар. Бэйэҕин тургутан көр, бу этиилэртэн хайата эйигин ордук сөпкө ойуулууруй? Хас биирдии ыйытыыга биир баалы биэрэр биир эрэ хоруй баар. Түмүккэ баалларгын холбоон ааҕаан, түмүгү таһаарар.

Хамаанданан үлэлиир бырайыаккыт табыллыбата. Эн бастакы санаан?

Ким буруйдааҕын көрдүөм, тоҕо табыллыбатаҕын чопчулуом.

Мин эппиэтинэһи бэйэбэр ылыам, хамаанда алҕастарын ырытан, инникитин хайдах тупсарары толкуйдуом.

Санаам түһүө, бу бырайыактан аккаастаныахха наада дии саныам.

Улахаҥҥа уурбаппын, "оннук буолар" диэн аһарынан кэбиһиэм.

Правильно! Не правильно!

Суһаллык уонна уустук быһаарыыны ылынарга тирээн кэллэ. Эн туох диигин?

"Бары бииргэ мустан сүбэлэһиэххэ". Дьон барыта сөбүлэһэрин күүтэбин.

"Салайааччыбыт туох диирэ буолла?". Үөһэттэн хоруй күүтэбин.

Быһаарыы ылынартан туттунабын, баҕар бэйэтэ быһаарыллан хаалыа дии саныыбын.

"Мин быһаарыам". Баар информацияҕа олоҕуран, эппиэтинэһи бэйэбэр ылынабын.

Правильно! Не правильно!

Хамаандаҕа саҥа идиэйэ киирдэ, ол эрээри элбэх киһи утарда, саарбаҕалаата. Эн дьайыыҥ?

Бу идиэйэ тоҕо туһалааҕын, туох кэскиллээҕин дьоҥҥо ылыннарыылаахтык кэпсиэм, итэҕэтэ сатыам.

Утарар дьон диэки буолуом, элбэх киһи сыыспат ини.

Идиэйэттэн аккаастаныам, айдааны таһаарыахпын баҕарбаппын.

Бэйэм эрэ билэр дьоммор кэпсиэм, кинилэр өйөөтөхтөрүнэ хамсаныам.

Правильно! Не правильно!

Эн санааҕар, лидер сүрүн соруга туохханый?

Үлэни кэмигэр уонна чопчутук толотторуу, хонтуруоллааһын.

Дьону көҕүлээһин, кинилэр талааннарын арыйыы уонна уопсай сыалга туһаайыы.

Хамаанда иһигэр эйэлээх сыһыаны олохтооһун.

Бары быһаарыыны бэйэбит ылынабыт.

Правильно! Не правильно!

Хамаандаҕа биир киһи үлэлииртэн аккаастанар, атыттарга мэһэйдиир. Хайыыгын?

Дьон мунньаҕар кинини дьүүллэһиигэ таһаарыам.

Салайааччыга тыллаан биэриэм, кини быһаардын.

Аахайбат курдук туттуом, бэйэтэ быһаарыллыа.

Кинини кытта туспа кэпсэтиэм, төрүөтүн быһаарсыам, көмөлөһө сатыам.

Правильно! Не правильно!

Үлэ түмүгүнэн ситиһии кэллэ. Эн туох диигин?

"Мин салайыым түмүгэр барыта таҕыста".

"Бу хамаанда барытын ситиһиитэ! Хас биирдиигит кылаата улахан!"

"Биһиэхэ табыллан биэрдэ".

Улахан ситиһиигэ тохтообокко, тута саҥа сорудахха көһөбүн.

Правильно! Не правильно!

Эйигин кириитикэлээтилэр. Эн тугу гынаҕын?

Болҕойон истэбин, этиилэрин иһин махтанабын уонна толкуйдуубун.

Бэйэбин көмүскэнэбин, сыыспатаҕым диэн дакаастыы сатыыбын.

Саҥарбакка хаалабын, ол эрээри испэр хомойобун.

Кириитикэни аахайбаппын, кинилэр син биир өйдөөбөттөр.

Правильно! Не правильно!

Саҥа хамаандаҕа киирдэххинэ, эн үксүн ханнык оруолу ылаҕын?

Үксүн дьон санаатын истэн, үлэ хаамыытын сааһылааччы буолан хаалабын.

Кэтээн көрөөччү, бэйэм санаабын испэр тутабын.

Идэлээх исписэлиис буоларбынан, бэйэм эрэ үлэбин толоробун.

"Кириитик" - мөлтөх өрүттэри ыйан биэрээччи.

Правильно! Не правильно!

Улахан сорудах турда. Хайдах саҕалыыгын?

Барытын бэйэм оҥоро сатыыбын, ким да мин курдук үчүгэйдик оҥоруо суоҕа.

Ким тугу гыныан баҕарарын ыйыталаһабын.

Уопсай былааны оҥоробун, сорудахтары чаастарга арааран дьоҥҥо дьоҕурдарын көрөн түҥэтэбин.

Ким эмит саҕалыырын күүтэбин.

Правильно! Не правильно!

"Лидер күүһэ – күүһүгэр буолбатах, сүрэҕэр" диэн этиигэ сөбүлэһэҕин дуо?

Икки өрүттээх. Күүс суох буоллаҕына эмиэ сатаммат.

Сөпкө. Дьоҥҥо сыһыан, кинилэри өйдөөһүн – лидер сүрүн күүһэ.

Сыыһа. Күүстээх, кытаанах быһаарыы ылынар киһи – дьиҥнээх лидер.

Бу философскай этии, олоххо оннук буолбат.

Правильно! Не правильно!

Психологическай тургутук: Эн лидер дьоҕуруҥ таһыма

Саҕалыыр таһым – «Эппиэтинэстээх толорооччугун». Эн лидер буоларга дьулуспаккын, ол оннугар эппиэтинэстээх, итэҕэллээх хамаанда киһитэҕин. Бу – олус кэрэхсэбиллээх хаачыстыба! Ханнык баҕарар лидергэ эн курдук үлэһит дьон наада. Өскөтүн лидер буолар баҕалаах буоллаххына, бастаан кыра сорудахтарга эппиэтинэһи ыла үөрэн. Бэйэҥ санааҕын аһаҕастык этэргэ, кыра да буоллар дьону түмэргэ холонон көр. Барыта бэйэҥ илиигэр.

Кэскиллээх таһым – «Түмэр-тэрийэр дьоҕурдааххын». Эн лидер буолар кэскиллээххин. Сөптөөх түгэн үүннэҕинэ, эппиэтинэһи ылыаххын, дьону салайыаххын сөп. Сороҕор саарбахтыыгын, эбэтэр бэйэҕэр эрэлиҥ тиийбэт буолуон сөп. Эйиэхэ кыра да буоллар, көҕүлээһини бэйэҕэр ыла үөрэнэр наада. Кыра хамаандалары салайан, дьону кытта алтыһан, бэйэҕэр эрэлиҥ күүһүрүө.

Үрдүк таһым – «Айылҕаттан лидергин». Эн дьону түмэр, батыһыннарар уонна көҕүлүүр дьоҕурдааххын. Эппиэтинэстэн куттаммаккын, уустук түгэҥҥэ быһаарыы ылынарга бэлэмҥин. Дьон эйигин истэр, эйиэхэ эрэнэр. Эн күүстээх өрүттэриҥ – кэскили көрүү, итэҕэтэр дьоҕур уонна хамаандаҕа сыһыан. Бу дьоҕургун өссө сайыннарарга, дьону истэ-билэ, кинилэр санааларын өйдүү үөрэнэ сырыт.