Психиатр-быраас Рита Потапова быһыы туһунан дойҕоҕу быһаарда

Бөлөххө киир:

Ковиды утары быһыыны ылыы туһунан дьон санаата араас: ким эрэ бэйэтин уонна чугас дьонун харыстаан, быһыыны кэмигэр ылар. Онтон ким эрэ араас дойҕохторго итэҕэйэн, харыстанар миэрэлэри тутуспат уонна чугас дьонун олоҕор кутталы үөскэтэр (доруобуйатын туругунан быһыы ылаллара көҥүллэммэт дьон бу араҥаҕа киирсибэттэр).

Доруобуйа харыстабылын министиэристибэтэ бэйэтин саайтыгар психоневрология өрөспүүбүлүкэтээҕи диспансерын медицинскэй, психологическай, социальнай-реабилитационнай отделын сэбиэдиссэйэ, психиатр-быраас Рита Потапова үс киэҥник тарҕаммыт дойҕоххо быһаарыы биэрбитин бэчээттээтэ.

1 дойҕох: «Быһыыттан өлөллөр»

— Оннук буолбатах. Бэйэбит диспансербытын холобурдуохпун баҕарабын: биир да үлэһиппит уонна ыарыһахпыт быһыыттан өлбүт түбэлтэтэ суох. 443 үлэһиттэн 385 киһи хайыы үйэ ревакцинацияланна, атыттар график быһыытынан эмиэ ылаллар. Ааспыт сылтан эмтэммит 1751 ыарыһахтан 98% икки түһүмэхтээх быһыыны ылбыта уонна графигынан ревакцинацияны ааста. Хаалбыт 2% -– оҕолор уонна быһыы ылаллара көҥүллэммэт дьон.

2 дойҕох: «Быһыы бэрэбиэркэлэммэтэх».

— Биирдэ эрэ буолбакка, элбэх бэрэбиэркэни ааһар. Судаарыстыба биһиги доруобуйабытын харыстыыр, онон вакциналар бэрэбиэркэлэммэтэхтэр эбэтэр буортулаахтар диэн -– сыыһа өйдөбүл. Официальнай саайтарга баҕалаах дьоҥҥо ыытыллыбыт боруобалааһыннары чинчийиилэр тустарынан уонна ковиды утары быһыы куттала суоҕун туһунан наука сурунаалларыгар тахсыбыт ыстатыйалары булан көрүөххэ сөп.

3 дойҕох: «Ыалдьыбыт киһи быһыы ылыа суоҕун сөп».

— Быһыы ылар наада! Ыалдьыбыт дьон антителата сотору кэминэн намтыыр, онтон олох да сүтэр. Ол аата антителата суох киһи көмүскэнэр кыаҕа сүтэр. Ол иһин, ыарыыны утары охсуһар кыаҕы күүһүрдэр туһугар быһыыны ылар наадата үөскүүр.

Саха сирин ЦУР Саха сирин олохтоохторугар ыыппыт онлайн-чинчийиилэрин түмүгүнэн, быһыыны ылартан аккаастанар сүрүн биричиинэлэринэн быһыы туһалааҕар сарбаахтааһыннара (74%) уонна быһыы кэннинээҕи содултан куттаналлара (69%) буолар.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0