Прокопий Бубякин: «Эмис нэһилиэгиттэн Спортивнай оонньууларга 13 киһи кыттар»
Саха сирин норуоттарын спортивнай оонньууларыгар Амма улууһун хамаандата 13 көрүҥҥэ кыттар. Бу туһунан Эмис нэһилиэгин баһылыга Прокопий Бубякин кэпсээтэ. Аммалар Саха сирин норуоттарын VII спортивнай оонньууларыгар иккис миэстэ буолбуттара. Онон, бу да сырыыга инники күөҥҥэ тахсарга эрэллээхтэр.
— Эмис нэһилиэгиттэн Спортивнай оонньууларга 13 киһи кыттар. Биһиги дьоммут ГТО-ҕа, сүүрүүгэ, остуол тенниһигэр, волейболга кытталлар. Эмис нэһилиэгэ улууспутугар теннисчит уонна дуобатчыт дьоннордооҕунан биллэр. Ол курдук теннискэ алта киһи кыттар. Виктор Золотов сүүрүүгэ, ГТО-ҕа Авдей Тимофеев уонна теннискэ бүгүн алта киһибит кытынна, — диэн Прокопий Петрович кэпсээтэ.
Уопсайа Саха сирин норуоттарын спортивнай оонньууларыгар Амма улууһуттан 91 спортсмен кытта сылдьар.
edersaas.ru