От ыйын 6-8 күннэригэр Дьокуускайга «ПРОФстарт-2018» ыччат өрөспүүбүлүкэтээҕи онус форума буолуоҕа.
edersaas.ru
Үгэс буолбут форумҥа Дьокуускай куорат уонна өрөспүүбүлүкэ улуустарын үлэлиир ыччаттарыттан профсоюз 100-чэ актыбыыһа кыттыаҕа.
Дьокуускай к. таһыгар «Ил Эйгэ» диэн кэрэ айылҕалаах сиргэ ыытыллар форум чэрчитинэн маастар-кылаастарга, семинардарга профсоюз үлэтин уратытын кэпсиэхтэрэ. Манна ылбыт билиилэринэн хамаандалар сүрүн сорудаҕы – видео-бырайыактары көмүскүөхтэрэ. Ону таһынан, быйылгы форум биир уратытынан биирдиилээн бырайыактар буолуохтара. Ол эбэтэр, баҕалаахтар профсоюз үлэтин хайысхаларынан бырайыактары бэлэмниэхтэрин сөп. Ол түмүгүнэн бастыҥ хамаандалар уонна уонча көхтөөх кыттааччы быһаарыллыахтара.
Маастар-кылаастары уонна трениннэри ыытарга Москваттан коуч, психолог Михаил Некрасов ыҥырылынна.
От ыйын 7 күнүгэр мини-футболга чемпионат ыытыллыаҕа. Бу күн футболга Арассыыйа-Хорватия оонньуутун көрөр анал фан-зона тэриллэрэ былааннанар.
Надежда ЕГОРОВА, «Саха сирэ» хаһыат, edersaas.ru