Профсойуустар үлэлэрин ФНПР бэрэссэдээтэлин солбуйааччыта Давид Кришталь хайҕаата
Ааспыт нэдиэлэҕэ Дьокуускайга Идэлээх сойуустар актыбыыстарын бастакы форумнара буолан ааста. Өрөспүүбүлүкэ араас улуустарыттан 500-тэн тахса киһи кэлэн кытынна. Манна Арассыыйа көҥүл профсойуустарын федерациятын (ФНПР) бэрэссэдээтэлин солбуйааччы Давид Кришталь уонна бу тэрилтэ сэкиритээрэ, Уһук Илин регионугар бэрэстэбиитэлэ Андрей Беляев кыттыыны ыллылар.
Форумҥа сүрүннээн баар кыһалҕалары ырытыстылар. Профсойуус каадырдарын квалификациятын үрдэтэр, дьиссипилиинэни көтөҕөр наадалааҕын ыйдылар. Куттала суох үлэ усулуобуйатын тэрийии, үлэһит доруобуйатын харыстааһын, уопсастыбаннас өттүттэн хонтуруол туһунан кэпсэттилэр.
“О специальной оценке условий труда” диэн федеральнай сокуон сорох үлэҕэ тахсар саахалларга үлэһиттэр эчэйиилэрин, доруобуйаларыгар дьайарын учуоттаабатын, эбии уларытыылар киириэхтэрин наадатын туһунан эттилэр. Үлэ бырааба кэһиллиитэ тахса турарын, сороҕор тэрилтэҕэ кэлэктиип дуогабара тутуһуллубат түгэннэрэ баарын, социальнай партнердар эппиэтинэстэрэ суоҕун, о.д.а. боппуруостары ырытыстылар.
ФНПР лидердэрэ үлэһиттэри хайдах көҕүлүүр туһунан бэйэлэрин уопуттарын үллэһиннилэр, көдьүүстээх ньымалары кэпсээтилэр. Давид Кришталь Ил Дархан Егор Борисовы кытары көрсүһүүтүгэр: “Өрөспүүбүлүкэҕэ ыытыллар үлэ хабаанын көрөн-истэн, сөхтүм. Атын регионнар эһигиттэн холобур ылыахтарын наада эбит. Форумҥа элбэх үчүгэй этии киирдэ” диэн эттэ. Оттон СӨ Идэлээх сойуустарын федерациятын бэрэссэдээтэлэ Николай Дегтярев ити барыта бырабыыталыстыбаны уонна үлэни биэрээччилэр түмсүүлэрин кытары былааннаах үлэ түмүгүнэн ситиһиллэрин кэпсээтэ.
Түмүктүүр киэһэҕэ С.Н. Маркин аатынан бириэмийэни туттарыы буолла. Бириэмийэни бастыҥ үлэлээх идэлээх сойууска туттараллар. Лауреат аатын уонна 100 тыһ. солк. Тэлэбиидэнньэ уонна араадьыйанан биэрии техническэй киинин үлэһиттэрин идэлээх сойууһа ылла.
Быйылгы форум түмүгү таһаарар, итэҕэһи туоратар, үөрэтэр, үлэни былаанныыр, кэлэр 100 сыллаах үбүлүөйгэ бэлэмнэнэр соруктаах ыытылынна.
Ангелина ВАСИЛЬЕВА.