Атырдьах ыйын 4 күнүгэр Дьокуускайга «ProДФО» форум чэрчитинэн эспиэрдэр, видеоконтент эдэр ааптардара уонна режиссердар Арассыыйа киинэтин тыйаатырдара көрсөр сүрүн кыһалҕаларын дьүүллэстилэр.
edersaas.ru
Онуоха форум кыттыылаахтара Саха сиригэр киинэни оҥорооччулар уопуттарыгар сигэммиттэрэ уонна киэҥник дьүүллэспиттэрэ кэрэхсэбиллээх. Ити билигин саха киинэтин Арассыыйаҕа киэҥник билэллэрин уонна сэҥээрэллэрин көрдөрөр.
«Российский культурный код, как сфера притяжения и удержания населения Дальнего Востока» диэн кэпсэтиигэ «Союзмультфильм» киинэ устуудьуйа дириэктэрэ Борис Машковцев, “Россия 1” тэлэбидиэнньэ ханаалын репортера Олег Пакшин, “Сахафильм” уус-уран салайааччыта Алексей Романов, СӨ бырабыыталыстыбатын бэрэссэдээтэлин солбуйааччы Ольга Балабкина уо.д.а. үгүс ахсааннаах кыттааччы санаатын үллэһиннэ.
Алексей Романов киинэ тыйаатырдарыгар омук киинэлэрэ тиийбэт буолбуттарын тугунан солбуйар туһунан боппуруоска: “Быйыл биһиэхэ 20-чэ эрэгийиэннээҕи киинэ тахсыаҕа. Күһүн уонна кыһын саҥа киинэлэр көрдөрүллэллэрэ күүтүллэр. Быракаакка биһиги исписэлиистэрбит бэлиэтииллэринэн, ааспыт кыбартаалга киинэ репертуарын 40 % саха киинэтэ ылла. Мин инникитин өссө да элбэх саха киинэтэ тахсыаҕар эрэнэбин. Саха киинэтэ өрөспүүбүлүкэ таһыгар чахчы биллэр буолла”, — диэн экраҥҥа саха киинэтэ тахсыыта эрэгийиэннээҕи киинэ тыйаатырдарыгар биллэр өйөбүлү оҥорорун туһунан бэлиэтээн эттэ.
Ольга Балабкина Саха сирин бырабыыталыстыбата эрэгийиэннээҕи киинэни өр сылларга күүскэ өйөөн кэлбитин бэлиэтээтэ. Ону таһынан көрөөччү тыйаатыртан мусуойга эбэтэр мусуойдартан тыйаатырга көһүө дуу диэн модератор ыйытыытыгар, бастакынан Ольга Балабкина санаатын үллэһиннэ. Кини Саха сирин хайа баҕарар улууһун нэһилиэгэр тиийдэххинэ, норуот тыйаатырдарын эбэтэр уус-уран самодеятельность кэлэктииптэрин хайаан да булаҕын. Кинилэр сүрүннээн саха суруйааччыларын айымньыларын, ордук суруйааччы, драматург Дмитрий Наумов тыа сирин көрөөччүтүгэр олус тиийимтиэ, көрдөөх айымньыларын хото туруоралларын астына бэлиэтээтэ.
Онтон Арассыыйаҕа сотору кэминэн сакалаат оҥорор фабрикаҕа уһуллубут «Чебурашка» киинэ саҥардыллан, саҥа сюжеттанан тахсыахтааҕын форум кыттыылаахтара үөрэ-көтө иһиттилэр. Тыйаатырга сылдьыы оҕо саастан саҕаланар.
Недежда ЕГОРОВА, edersaas.ru