Биллэрин курдук, РФ Наркотигы эргитиини хонтуруоллуур федеральнай сулууспата былырыын ыам ыйыгар сабыллыбыта. Инньэ гынан, наркотикка сыһыаннаах буруйдары утары охсуһуу үлэтэ бүтүннүү ис дьыала уорганнарыгар бэриллибитэ.
Вера МАКАРОВА, «Саха сирэ», https://edersaas.ru/
Ол курдук, СӨ ИДьМ-тын тэрээһиннээх бөлөхтөр дьыалаларын силиэстийэлиир чааһын силиэдэбэтэллэрэ, Наркотигы эргитиини хонтуруоллуур управлениетын уонна Өймөкөөннөөҕү Ис дьыала отделын полицейскайдара наркотигы Приморскай кыраайтан киллэрэр бөлөҕү арыйдылар.
Ааспыт сыл балаҕан ыйыттан сэтинньигэ диэри кэмҥэ Уус Ньара бөһүөлэгэр полиция үлэһиттэрэ наркотигы батарыынан дьарыктанар 18-тан 30-гар диэри саастаах уолаттары туппуттар. Дьэҥдьиир кэмигэр кинилэртэн бөдөҥ кээмэйгэ киирсэр ыйааһыннаах гашиштаах арыыны булбуттар. Бу уорбаланааччылар төрдүөн тэрээһиннээх бөлөххө киирэллэрэ биллибит.
Суһал-ирдиир тэрээһиннэр кэмнэригэр полицейскайдар бу бөлөҕү тэрийбит киһини уонна өссө атын кыттыгастарын буларга бары күүһү-сыраны уурбуттар. Наркотик киирэр ханаала Владивосток куораттан силис тардарын билэн, онно бара сылдьыбыттар. Дьэ уонна бу бөлөх тэрийээччитин — Приморскай кыраай 26 саастаах олохтооҕун — итиэннэ наркотигы оҥоруунан дьарыктанар урут сууттана сылдьыбыт, Краснодарскай кыраайтан төрүттээх 39 саастаах киһини туппуттар.
Сабаҕалаан быһаарыынан, бу тэрээһиннээх бөлөх чилиэннэрэ наркотигы мобильнай сибээс араас бырагыраамматын туһанан батара сылдьыбыттар. Онтуларын бытовой химия флаконнарыгар уган тарҕаппыттар. Кинилэртэн батарыыга бэлэмнэммит өссө 1 киилэттэн тахса ыйааһыннаах гашиштаах арыы уонна наркотигы оҥорорго аналлаах иһит-хомуос, тэрил былдьаммыт.
Бу чахчынан РФ Холуобунай кодексатын 228.1 ыст. 4-с чааһынан дьыала тэриллибитин туһунан СӨ ИДьМ-тын пресс-сулууспата иһитиннэрдэ. Бу ыстатыйанан көрүллэр накаастабыл миэрэ — 10-тан 20 сылга диэри көҥүлү быһыы.
Уорбаланааччылартан иккитэ Силиэстийэлиир изоляторга хаайылынна.
Вера МАКАРОВА, «Саха сирэ», https://edersaas.ru/
Хаартыскалар: СӨ ИДьМ-тын пресс-сулууспата.