Бу күннэргэ Өксөкүлээх Өлөксөй аатынан Норуоттар доҕордоһууларын дьиэтин иһинэн үлэлиир “Симэх” уус-уран национальнай кииҥҥэ Петр Романов аатынан Дьокуускайдааҕы ойуулуур-дьүһүннүүр искусство училищетын (кэллиэһин) устудьуоннарыгар, төрөппүттэргэ анаан лекторий уонна сэминээр-дьарык буолла.
“Саха сирэ” хаһыат, edersaas.ru
Тэрээһини П. Романов аатынан Дьокуускайдааҕы ойуулуур-дьүһүннүүр искусство училищетын (кэллиэһин) туоһунан иискэ преподавателэ, СӨ култууратын туйгуна Надежда Корнилова ыытта.
Надежда Егоровна “Симэх” норуот искусствотын национальнай киинин, А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтин национальнай сыһыаннаһыыларга ресурснай үөрэтэр-методологическай киинин кытта ыкса ситимнээхтик үлэлэһэр.
Туос оҥоһуктары сөргүтүүгэ уонна чөлүгэр түһэриигэ дьаныһан дьарыктанар, Саха сиригэр искусствоны чинчийиигэ ыыппыт үлэтигэр олоҕуран үүнэр көлүөнэни үөрэтэр. Төрөппүттэр, устдьуоннар лиэксийэни сэҥээрэн иһиттилэр, быһаччы дьарыкка устудьуоннар быыстапкаҕа турар туос оҥоһуктары кээмэйдээн уруһуйдаатылар. Преподаватель туос оҥоһук хайдах оҥоһулларын сиһилии кэпсээтэ. Кэлэр сайын Таатта улууһугар экспедицияҕа барар былааннаахтар.
“Симэх” галерея куорат олохтоохторун, ыалдьыттарын уус-уран искусство салаатын устудьуоннарын туостан быыстапкатын кэлэн көрөргүтүгэр ыҥырар. Быыстапка 2020 сыл тохсунньу 13 күнүгэр диэри турар.
“Симэх” норуот уус-уран искусствотын уонна оҥоһуктарын киинэ.