Премьер-миниистир Андрей Тарасенко Саха сиринээҕи билим киинигэр сырытта
“Арассыыйатааҕы билим академиятын Сибиирдээҕи салаатын Саха сиринээҕи билим киинэ” федеральнай чинчийэр кииҥҥэ Арассыыйатааҕы Билим күнүгэр аналлаах үөрүүлээх мунньахха СӨ Бырабыыталыстыбатын бэрэссэдээтэлэ Андрей Тарасенко, Арассыыйатааҕы билим академиятын Сибиирдээҕи салаатын кылаабынай учуонай сэкирэтээрэ Дмитрий Маркович, СӨ Үөрэҕин уонна наукатын миниистирэ Михаил Сивцев кытыннылар.
Бастатан туран, салайааччылар “Арассыыйатааҕы билим академиятын Сибиирдээҕи салаатын Саха сиринээҕи билим киинэ” федеральнай чинчийэр киин Наукалар академияларын Сибиирдээҕи салаатын ньиэпкэ уонна гааска проблемаларын институтун ядернай магнитнай резонанс спектроскопияҕа лабораториятыгар сырыттылар. Онно Bruker фирма Avance 400 үрдүк күүстээх ЯМР-спектрометрын көрдүлэр. Арассыыйатааҕы билим академиятын Сибиирдээҕи салаатын ньиэпкэ уонна гааска проблемаларын институтун дириэктэрэ, тиэхиньикэ билимин дуоктара Марина Соколова иһитиннэрбитинэн, ЯМР-спектроскопия молекулярнай таһымҥа бэссэстибэ тутулун чинчийэргэ күүстээх үстүрүмүөнүнэн буолар итэннэ естественнэй уонна тиэхиньиическэй билим киэҥ эйгэтигэр туһаныллар.
Институт алын научнай сотруднига Владилина Корякина, бу прибор көмөтүнэн быраактыкаҕа үтүө түмүктээх кэккэ научнай-чинчийэр үлэлэр ыытыллыбыттара, ону тэҥэ, биһиги учуонайдарбыт диссертацияҕа үлэлэригэр тирэҕинэн буолбута диэн кэпсээтэ.
“Анаабыр алмаастара” АУо кытта Арктика усулуобуйатыгар туһаныллар ыарахан тиэхиньикэ мотуорун арыытын кыаҕын үлэтин чинчийиини кэтээн көрүү оҥоһуллубута. ХИФУну кытта Кэмпэндээйи сириттэн айылҕа цеолитын химическэй модификациятын, айылҕаҕа үөскүүр биллибэт бэссэстибэлэр химическэй тутулларын, ону тэҥэ, Талаканнааҕы ньиэп уонна алын температуралаах препарат дизельнэй чааһын састаабын үөрэтиигэ чинчийии ыытыллыбыта.
“Арассыыйатааҕы билим академиятын Сибиирдээҕи салаатын Саха сиринээҕи билим киинэ” федеральнай чинчийэр киинин бэрэссэдээтэлэ, Арассыыйатааҕы билим академиятын член-корреспондена Михаил Лебедев ыалдьыттарга, Саха сиригэр аан дойду таһымнаах «Природный коллайдер криолитозоны» билим киинэ тэриллибитин кэпсээтэ. Координаторынан “Арассыыйатааҕы билим академиятын Сибиирдээҕи салаатын Саха сиринээҕи билим киинэ” федеральнай чинчийэр киин буолар. Аан дойду таһымнаах билим саҥа киинэ Арассыыйа Хотугулуу-Илиҥҥи уларыйа сылдьар килиимэттээх айылҕатын эйгэтин туругун үөрэтиигэ, экологичнай уонна энергоэффективнай технологиялары тэрийиигэ, биологическай уонна ветеринарнай саҥа препараттары оҥорууга, о.д.а. улахан соруктаах.
“Арассыыйатааҕы билим академиятын Сибиирдээҕи салаатын Саха сиринээҕи билим киинэ” федеральнай чинчийэр киинин пресс-сулууспата.
Хаартыска: Марии ВАСИЛЬЕВА (СИА).