Премьер-миниистир Андрей Тарасенко Аммаҕа үлэлээтэ

Ааптар: 
Бөлөххө киир:
Бэс ыйын 10 күнүгэр Амма улууһугар СӨ Бырабыыталыстыбатын бэрэссэдээтэлэ Андрей Тарасенко оробуочай сырыынан кэлэн барда. Сырыы кэмигэр турбут этиилэри, туруорсуулары премьер сөптөөҕүнэн аахта уонна хайа кыалларынан ону өйүүрүн биллэрдэ.


Амма улууһугар Бырабыыталыстыба бэрэссэдээтэлэ күн устата үлэлээтэ. Ол курдук сарсыарда 8 аҥаар чаастан саҕалаан киэһэ 5 чааска диэри тохтоло суох хас да нэһилиэгинэн сырытта, эбийиэктэри көрдө, үлэһиттэри кытта кэпсэттэ. Түмүккэ улуус сайдыытыгар туһуламмыт сүбэ мунньах ыытылынна.

Андрей Владимировыһы кытта СӨ Тыатын хаһаайыстыбатын миниистирэ Александр Атласов, улуус баһылыга Николай Архипов сылдьыһан баар балаһыанньаны билиһиннэрдилэр. Ол курдук кэлээт да, Чапчылҕаҥҥа И.Н. Емельянов аатынан аһылык комплексын үлэтин кытта билистэ. Манна аһылык комплекса эргэрбитинэн уларыта тутан оҥоруу, оборудованиетын саҥардыы боппуруостара турдулар. Онтон Абаҕаҕа тиийэн Емельяновка учаастагын, 240 сүөһү турар хотонун көрдө. Емельяновкаҕа хочуолунай кэлэн туруутун кэпсэттилэр. Бу кэнниттэн Амма Наахараҕа айаннаан иһэн, аара бэс ыйын 6 күнүн түүнүгэр сиҥнибит Хокур муостатыгар тохтоон, тутуу биригэдьиирин кытта кэпсэттэ. Олохтоох дьон үлэлии сылдьалларын көрөн сэҥээрдэ. Салгыы нэһилиэккэ тиийэн 75 миэстэлээх таас уһуйаан тутуутун көрдө, графиктан хаалбаттарыгар эттэ. Манна уһуйаан толору ситэригэр эбии 60 мөл. солк харчы тиийбэт. Маны Бырабыыталыстыба бэрэссэдээтэлэ болҕомтоҕо ылла уонна уһуйаан хайаатар да үлэҕэ киириэ диэн эттэ.

Салгыы оробуочай бөлөх Болугур нэһилиэгэр кэлэн Хаттыкы учаастагар баар хаарбах туруктаах сүөһү турар комплексын көрдө уонна манна чахчы да реконструкция барыан наада эбит диэн бэлиэтээтэ. Манна кинини Ил Түмэн дьокутаата Руслан Федотов көрүстэ. Онтон Покровка нэһилиэгэр айаннаата. Манна Ааллаах учаастагар тиийэн “Амма” ААуо үлэтин билистэ, үлэһиттэри кытта көрсөн, эргэ техникаҕытын үчүгэйдик көрө-истэ сылдьар эбиккит диэн бэлиэтээтэ.

Хаһаайыстыба күүскэ сайдарыгар кини оройуоннаммыт сиэмэни оҥорор таһаарар хаһаайыстыба буолуохтааҕын, өрөспүүбүлүкэҕэ хайаатар бурдук үүннэриитин бырагыраамата баар буолуохтаах диэн туруорустулар, базаны көрдөрдүлэр. Онтон салгыы “Үс Хатыҥ” диэн туристическай базаҕа кэлэн сүбэ мунньаҕы ыытта. Мунньахха сорох улахан хаһаайыстыбалар бэрэссэдээтэллэрэ, бааһынай хаһаайыстыбалар кыттыыны ыллылар. Ону сэргэ нэһилиэк баһылыктара онлайн форматынан кытыннылар.

Мунньахха улуус баһылыга Николай Архипов улуус туруорсар боппуруостарын билиһиннэрдэ. Ол иһигэр үрдүк күүрүүлээх уот кэлиитэ, суол оҥоһуута, хаһаайыстыбалар сайдыыларын, Саһыл Сыһыы мемориальнай комплексын бырайыактыыр докумуонун оҥорууга үбүлээһин уонна да атын сайдыыга туһуламмыт суолталаах боппуруостар турдулар. Кэпсэтиигэ Ил Түмэн дьокутаата Руслан Федотов, “Бөтүҥ” ТХПК бэрэссэдээтэлэ Дмитрий Левин, “Амма” СППК дириэктэрэ Айысен Черноградскай, Покровка нэһилиэгиттэн фермер Игорь Петров, Сэргэ Бэстэн Александр Фомин, Покровка нэһилиэгин баһылыга Олег Черкашин, Амма улууһун култуураҕа управлениетын салайааччыта Иван Иванов кыттан санааларын эттилэр, этиилэри киллэрдилэр.
“Бары туруорсуулар олох сөптөөхтөр. Ону быһаарарга бииргэ үлэлиэхпит. Амма фермердэрэ үлэлэригэр бэриниилээхтэрин, үлэлииргэ, сайдарга улахан баҕалаахтарын, интэриэстээхтэрин  астынным. Саамай кылаабынайа ким да мантан барар санаата суох уонна үүнэргэ-сайдарга баҕалаахтар, ону мин олус сэргии көрдүм. Кинилэр бородууксуйа оҥорон, сири кытта үлэлээн өрөспүүбүлүкэни аһатар баҕалаахтар. Маннык үлэһит дьону хаһан баҕарар өйүүргэ бэлэммин.  Улуус аграрнай, тыа хаһаайыстыбатын улууһа буолар. Онон бу салаанан уонна биллэн туран бачча кэрэ айылҕалаах буоларынан туризмынан сайдыахтаах. Ол өттүгэр улууска улахан кыах барыта баар. Инникитин бары бииргэ үлэлээтэхпитинэ кыайыылаах уонна ситиһиилээх буолуохпут”, — диэн Бырабыыталыстыба бэрэссэдээтэлэ Андрей Тарасенко оробуочай сырыытын түмүгэр бэлиэтээтэ. Мунньах түмүгүнэн тыа хаһаайыстыбатын миниистиригэр Александр Атласовка, улуус баһылыгар Николай Архиповка турбут боппуруостарынан  бэйэлэрин этиилэрин киллэрэллэригэр эттэ.

«Амма олоҕо» хаһыат
 @amma_olo5o
+1
0
+1
0
+1
0
+1
0
+1
0
+1
0
+1
0