Култуура Сүрүн

«Предтеча» номоххо киирэр кинигэ сүрэхтэннэ

Ахсынньы 3 күнүгэр СӨ Судаарыстыбаннай Мунньаҕын (Ил Түмэн) мунньахтыыр саалатыгар «Предтеча» кинигэ сүрэхтэннэ.«Предтеча» -– «Национальная интеллигенция и становление государственности народов Якутии» серияҕа (бырайыагы көҕүлээччи уонна салайааччы Александр Жирков) үһүс кинигэнэн таҕыста.

 

Илья Шадрин удьуордара Галина Шадрина уонна Юлия Дьячкова

Тэрээһин кыттыылаахтара аан бастаан СӨ Национальнай бибилэтиэкэтэ тэрийбит саха интеллигенцията үөскээһинин устуоруйатыгар анаммыт быыстапканы билистилэр.
Саҥа кинигэ сүрэхтэниитин СӨ духуобунаска академиятын вице-бэрэсидьиэнэ, СӨ Судаарыстыбаннай бириэмийэтин лауреата Олег Сидоров иилээн-саҕалаан ыытта. Тэрээһиҥҥэ СӨ норуодунай дьокутааттара, муниципальнай тэриллиилэр баһылыктара, уопсастыбыннай тэрилтэлэр бэрэстэбиитэллэрэ, учуонайдар, Софрон Сыранов, Сэһэн Аржаков, Илья Шадрин олохторун уонна норуот туһугар үлэлэрин чинчийээччилэр, Сэһэн Аржаков уонна Илья Шадрин аймах дьоно кытыннылар.
СӨ Судаарыстыбаннай Мунньаҕын (Ил Түмэн) бэрэссэдээтэлэ Алексей Еремеев бэйэтин эҕэрдэтигэр: «Убаастабыллаах Александр Николаевич, Эн Софрон Сыранов, Алексей (Сэһэн) Аржаков уонна Илья Шадрин туһунан кинигэҥ Георгий Башарин «Саха үс реалист-сырдатааччыта» монографиятын салҕыытынан буолар…», -– диэн кинигэ Саха сирин устуоруйатын көмүс страницатыгар номоххо киирэр кинигэнэн буоларыгар эрэлин биллэрдэ.
Санааларын үллэстибит дьон: СӨ Ил Түмэнин бэрэссэдээтэлин бастакы солбуйааччылар Александр Жирков уонна Анатолий Добрянцев (бэһис ыҥырыылаах), Владыка Роман уо.д.а. саҥа серияҕа дьоһун сыанабылы биэрдилэр уонна кинигэ кэлэр көлүөнэҕэ суолтатын ырыттылар.
Ем.Ярославскай аатынан судаарыстыбаннай мусуой наукаҕа сүбэһитэ Егор Шишигин  кинигэ этэр санаатын уонна сыалын-соругун атын улуустар иилэ хабан ылан, бу серия утумнааччылардаах буоларыгар баҕа санаатын тириэртэ.
Кинигэҕэ 22 ааптар ыстатыйалара, монографиялара киирбиттэр. Ол иһигэр, судаарыстыба бастакы сирэй дьонугар саха норуотун кыһалҕатын быһаарса тиийбит Софрон Сыранов, Алексей (Сэһэн) Аржаков уонна Илья Шадрин туһунан саҥалыы көрүүлэр, ырытыылар ааҕааччы интэриэһин тардыахтара.

Надежда ЕГОРОВА, «Саха сирэ», edersaas.ru 
(Сиһилии «Саха сирэ» хаһыат 09.12.21 күнүнээҕи нүөмэригэр билсиҥ)

0
0
Telegram @edersaas20