Суолталаах Экэниэмикэ

Предпринимательствоҕа 100-тэн тахса өйөбүл арааһа баар

Саха сирин предпринимательствоҕа, эргиэҥҥэ уонна туризмҥа миниистирин бастакы солбуйааччы Максим Карбушев Саха сирин экэниэмикэтэ туруктаах сайдыытыгар  суһал ыстаап бүгүҥҥү мунньаҕын кэнниттэн суруналыыстары кытары көрүстэ.

edersaas.ru

Миниистири солбуйааччы эппитинэн, Саха сиринээҕи  ЦУР быйыл ыам ыйыгар уонна от ыйыгар дьоҕус уонна орто предпринимательство субъектарын ортолоругар ыйытык оҥорбута. Ыйытык саансыйа ыгар-түүрэр кэмигэр өрөспүүбүлүкэҕэ биисинэһи өйүүргэ федеральнай уонна эрэгийиэннээҕи миэрэлэри олоххо киллэриигэ анаммыта.

“Ыйытыы түмүктэрэ өйөбүл миэрэлэрин  туһунан предпринимательствоҕа  иһитиннэрии элбээбитин көрдөрөллөр. Ону таһынан өйөбүл ордук көдьүүстээх өрүттэрин эмиэ ыйбыттара. Көдьүүстээх миэрэлэр ортолоругар нолуок ноҕуруускатын аҕыйатарга, чэпчэтиилээх кирэдьииттэргэ уонна дьоҕус үбүлээһиҥҥэ хайысхаламмыт миэрэлэр ааттаннылар. Ил Дархан  Айсен Николаев бобуулаах предпринимательство үлэтин хонтуруоллуур наадатыгар ураты болҕомтотун уурда. Тоҕо диэтэххэ, бэрэбиэркэлэргэ мораторийы киллэрии бобуулаах биисинэс сайдарыгар тириэрдибитэ.

Өрөспүүбүлүкэҕэ өйөбүл 100-тэн тахса миэрэтэ баар (федеральнай, өрөспүүбүлүкэтээҕи уонна муниципальнай). Миэрэлэри кэмигэр ылыныы дьоҕус уонна орто биисинэһи оннунан хаалларарга эрэ буолбакка, предпринимательство эйгэтигэр дьарыктанааччылар элбииллэригэр тириэртэ”, — диэн миниистири бастакы солбуйааччы  Максим Карбушев түмүктээтэ.

Надежда ЕГОРОВА, «Саха сирэ», edersaas.ru

 

0
0
Telegram @edersaas20