“Дойдубутугар хааччахтар киирэ туралларынан уонна экономическай балаһыанньанан дьоҕус уонна орто бизнестаах дьоммутугар араас хабааннаах көмөлөрү оҥорбуппут. Ол эрээри билигин да дьоҕус, орто бизнеска кыаллыбатах боппуруостар бааллар”, – диэн иһитиннэрэр Ил Дархан Айсен Николаев предпринимательствоны салайар туһааннаах сэбиэт мунньаҕар.
Ил Дархан мунньахха предпринимательство эйгэтигэр өссө туох көмө киириэҕин иһитиннэрдэ. Бастатан туран, көмө коммунальнай өҥөлөрү төлөөһүҥҥэ киириэҕэ. Предпринимателлэр бырааптарыгар боломуочуйалаах Альбина Кычкина иһитиннэрбитинэн, билигин үгүстэр коммунальнай өҥөлөрүгэр иэстээх олороллор, ол түмүгэр туһааннаах тэрилтэлэр сылааһы, уоту, ууну биэрэллэрин тохтотон кэбиһэллэр. Предпринимателлэр сүрүн кыһалҕалара – коммунальнай өҥө сыаната үрдүгэ. “Билигин дьону аһатар тэрилтэлэр үксүн ууларыгар кыһалҕатыйан олороллор. Ону таһынан Алдан оройуонун предпринимателлэрэ уокка сыана үрдүгүн этэллэр”, – диэн иһитиннэрэр кини.
Айсен Николаев коммунальнай өҥөнү төлөөһүҥҥэ предпринимателлэртэн үгүс этии киирэ турарын, онон бу боппуруоһу бырабыыталыстыба, коммунальнай өҥөлөрү биэрэр туһааннаах тэрилтэлэр ырытан көрүөхтэрин наадатын этэн туран, кини быйыл сыана үрдээһинин тохтоторго, коммунальнай өҥөлөрүгэр иэстээх предпринимателлэргэ мораторий биллэрэргэ, Алдан оройуонугар уокка сыана үрдээһинин көрөргө сорудахтаата. Онон Ил Дархан этиитинэн ууга, уокка, ититиигэ иэстээх предпринимателлэргэ коммунальнай өҥөнү биэрэр тэрилтэлэргэ иэстэрин кыралаан төлөһөллөрүгэр кыах бэрилиннэ.
Иккиһинэн, мунньахха социальнай суолталаах аска-үөлгэ, табаарга сыана үрдээһинин боппуруоһун туруордулар. Сыана бэлиитикэтин судаарыстыбаннай кэмитиэтин салайааччыта Антонина Винокурова иһитиннэрбитинэн, социальнай суолталаах ас-үөл испииһэгэр кэлиҥҥи икки сылтан бэттэх оҕуруот аһа уонна фрукта эмиэ киирэн турар. Кини этэринэн, от ыйын 1 күнүгэр диэри биэдэмистибэ муниципальнай тэриллиилэри кытары бу испииһэги хаттаан көрүөҕэ. Ону сэргэ табаарга атыы сыанатын эбиигэ эмиэ кыһалҕалар баалларын эттэ. Бу боппуруоһунан кинилэр Антимонополия федеральнай сулууспатын кытары үлэлэһиэхтэрэ.
Түмүккэ Ил Дархан Айсен Николаев билиҥҥи балаһыанньаҕа Координационнай сэбиэт үлэтин-хамнаһын эмиэ уларытан биэриэхтээҕин, муниципальнай тэриллиилэри кытары быһаччы үлэлии олоруохтааҕын, предпринимателлэри кытары элбэхтэ көрсөн кэпсэтиэхтээҕин, кинилэр кыһалҕаларын быһаарыыга биир сүрүн оруолу ылыахтааҕын эттэ.
Аграфена КУЗЬМИНА