Предпринимателлэргэ нолуокка чэпчэтии киирдэ

Бөлөххө киир:

Өрөспүүбүлүкэбит экэниэмикэтэ туруктаах буолуутугар ылыныллыбыт миэрэлэр чэрчилэринэн, предпринимателлэргэ нолуокка чэпчэтиилэр киирдилэр. Туһааннаах сокуон барыла Ил Түмэн уочараттаах пленарнай мунньаҕынан бигэргэннэ.

Өрөспүүбүлүкэ бүддьүөтүгэр экэниэмикэ туруктаах буолуутугар анаммыт миэрэлэр учуоттананнар, уларытыы киирдэ. Өрөспүүбүлүкэ бүддьүөтүн быйылгы дохуоттаах чааһа 4,9 млрд солкуобайынан эбиллэн, 275,7 млрд солкуобайга тэҥнэһиэҕэ. Ороскуота 4,5 млрд солкуобайынан үрдээн, 310,2 млрд солкуобай буолуоҕа, оттон дефицитэ – 34,5 млрд солкуобай.

Экэниэмикэ миниистирэ Майя Данилова иһитиннэрбитинэн, нолуокка чэпчэтиилэр киирбиттэрэ предпринимателлэр бу уустук кэми аһардалларыгар көмө буолуоҕа.

– Ил Дархан Айсен Николаев сорудаҕынан оҥоһуллубут сокуон бырайыага предпринимателлэр уустук кэми аһардалларыгар көмө-тирэх буолуоҕа. Ол курдук, быйыл “дохуот” диэн категорияҕа нолуоктарын төлүүр предпринимателлэргэ нолуок ставката 1 % түстэ, оттон ороскуоттарын көҕүрэтэн туран дохуоттарын нолуогун төлүүр дьоҥҥо – 5 % диэри кыччаата. Бу кыччатыы аһыы утаҕынан эргинэр предпринимателлэргэ киирбэт, ону таһынан анал чэпчэтиинэн үп, страховка эйгэтигэр үлэлии сылдьар предпринимателлэр туһамматтар. Онтон атыттарга бу чэпчэтии быйылгыттан киирдэ, – диэн этэр Майя Андреевна.

Саҥа тахсыбыт сокуонунан нолуокка туох чэпчэтиилэр киирдилэрий?

2023 сылга тэрилтэлэр дьиэлэрин-уоттарын нолуогун кадастровай сыананан төлүүллэрэ көһөн биэриэҕэ. 2023-2027 сс. ОСНО ньыматын туһанан нолуоктарын төлүүр предпринимателлэргэ 50 % чэпчэтии көрүллүөҕэ.

Киинэ эйгэтигэр үлэлиир предпринимателлэр быйыл дьиэлэрин-уоттарын нолуогун төлүүллэригэр анал чэпчэтиинэн туһаныахтара.

Предпринимателлэр быйылгы дохуоттара былырыыҥҥы көрдөрүүлэриттэн 30 % кыччаабыт буоллаҕына, эрэгийиэннээҕи нолуогу төлүүр болдьохторо уһатыллан биэриэҕэ. Манна сыл устата ханнык баҕарар кыбаарталлааҕы отчуоттарын аҕалан көрдөрүөхтэрин сөп.

Кытаанах бөҕү-саҕы хомуйар тэрилтэлэргэ биэс сыл устата барыстарыгар төлүүр нолуоктара сотуллуоҕа. Манна 2021 сыллаах нолуоктара эмиэ ааҕыллар. Ону таһынан эмиэ 2021 сылтан саҕалаан биэс сыл устата өрөспүүбүлүкэтээҕи, муниципальнай суолларга сыһыаннаах предпринимателлэргэ дьиэҕэ-уокка, тутууга нолуоктарыгар көрүллүбүт чэпчэтиилэр уһатыллан биэриэхтэрэ. Урутаан сайдар сирдэр резиденнэригэр эмиэ анал чэпчэтиилэр көрүллүбүтэ.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0