“Биһиэхэ бэйэбитигэр үгүс талааннаах ыччаттаахпыт. Сколково курдук ИТ-дэриэбинэни тэрийэр киһи, өрөспүүбүлүкэҕэ саҥа технологиялары киллэриигэ элита тэриллиэ этэ”, — диэн бэлиэтиир “Туймаада” инновационнай технология пааркатын бырайыагын ааптара Сергей Хромов.
Уонча сыллааҕыта Сергей Хромов Дьокуускай куоракка 202-с оройуоҥҥа муус оҥоһуктар пааркаларын тэрийэ сылдьыбыта. Уопсастыбанньык быһыытынан, куорат сайдыытыгар үгүс этиини киллэрбитэ. Бэйэтэ миэбэлинэн дьарыктанар предприниматель. Экономическай, юридическай үөрэхтээх. Бизнес-инкубатор выпускнига. Ити идэлэрин туһанан, билигин саҥа бырайыакка ылсыбыт. Бу туһунан кини маннык иһитиннэрэр.
— Табаҕатааҕы тумуска ийэм учаастага баар. Онно туох эмит тутууну ыытыахха баар эбит диэн санаа үүйэ-хаайа туппута ыраатта. Бырайыакпытын оҥорорбутугар, Муусука Үрдүкү оскуолатын базатын холобуругар олоҕурбуппут. ИТ-дэриэбинэҕэ 20 коттедж, спортивнай, оҕо оонньуур былаһааккалара, гостиница, ресторан тутуллуохтаахтар. Тутуулар бары аныгы матырыйаалынан оҥоһуллаллар. Бэйэм өттүбүттэн сири-уоту, суолу-ииһи, бырайыагы, докумуону хааччыйабын. Өрөспүүбүлүкэ салалтатын кытары сөбүлэһэн оҥоруохтаахпыт. Мин санаабар, маннык бырайыактар сонун, саҥа идеялар, санаалар олоххо киирэллэригэр төһүү күүс буолаллар. Биһиэхэ бэйэбитигэр үгүс талааннаах ыччаттаахпыт. Кинилэр бу дэриэбинэҕэ олорон өрөспүүбүлүкэбит туһугар үлэлиэ-хамсыа этилэр.
Ону таһынан, кини кэнэҕэскитин чааһынай офтальмология киинин тэрийэр санаалаах. Сергей аҕыйах сыллааҕыта саахалга түбэһэн, хомойуох иһин, хараҕынан бастакы группалаах инбэлиит буолбута. Онон бу кыһалҕаны төрдүттэн билэр.
Аграфена КУЗЬМИНА, «Саха сирэ» хаһыат, edersaas.ru.