Кулун тутар 28 күнүгэр өрөспүүбүлүкэҕэ барыллаан куоластааһыны тэрийэн ыытар регионнааҕы кэмитиэт уочараттаах мунньаҕар дебаттар тиэмэлэрин бигэргэттилэр.
Роман Попов, “Саха сирэ” хаһыат, https://edersaas.ru
Онно этиллибитинэн, Дьокуускай куоракка дебаттар өрөбүл күннэргэ, муус устар 8-тан ыам ыйын 21 күнүн киллэрэн туран, ыытыллыахтара.
Онно хандьыдааттар бэйэлэрин билиһиннэриэхтэрэ, бырагыраамаларын кэпсиэхтэрэ, тирээн турар сытыы боппуруостарга санааларын үллэстиэхтэрэ, дебаттар тиэмэлэринэн ыйытыыларга хоруйдуохтара. Регламент усулуобуйатынан, хандьыдаакка хандьыдаат кырата икки дебакка кыттыыны ылыахтаах.
Тэрийэр кэмитиэт маннык тиэмэлэри бигэргэтэргэ быһаарда: “Үөрэҕирии хаачыстыбата уонна тоҕоостоох буолуута”, “Агропромышленнай комплекс уонна тыа сирэ”, “Куорат экэниэмикэтэ уонна инновация”, “Былаас уонна гражданскай уопсастыба диалога”, “Инфраструктура: куорат эйгэтин сайыннарыы”, “Дьокуускай куорат сайдыытын тосхоллоро”.
Роман Попов, “Саха сирэ” хаһыат, https://edersaas.ru