Потребительскай кооперация Дьокуускайдааҕы атыы-экэнэмиическэй кэллиэһин 634 устудьуонун атын кэллиэстэринэн көһөрбүттэр
СӨ Үөрэҕин уонна наукатын миниистирэ Михаил Сивцев бүгүн социальнай ситимнэринэн быһа сибээскэ тахсан, үлэһиттэр, төрөппүттэр ыйытыыларыгар хоруйдаата. Быһа сибээс кэмигэр Потребительскай кооперация Дьокуускайдааҕы атыы-экэнэмиическэй кэллиэһин туһунан туоһулаһыыга хоруйдаата.
Миниистир иһитиннэрбитинэн, алтынньы 28 күнүгэр Потребительскай кооперация Дьокуускайдааҕы атыы-экэнэмиическэй кэллиэһин тэрийэн таһаарааччытын кытта кэпсэппиттэр. Салгыы төрөппүттэри, преподавателлэри кытта көрсүбүттэр. “Бу кэмҥэ үөрэнэр 634 устудьуону Дьокуускай куоракка үлэлиир түөрт кэллиэскэ көһөрдүбүт. Биир кэтэхтэн үөрэнэр устудьуон сайабылыанньа суруйдаҕына кинини эмиэ көһөрүөхпүт. Күн бүгүн аармыйаҕа сылдьар”, — диэн быһаарда.
Тустаах кэллиэскэ Саха Өрөспүүбүлүкэтин сакааһынан 275 устудьуон үөрэнэрин, кинилэр балаҕан ыйынааҕы, алтынньытааҕы истипиэндьийэлэрин толору ылыахтарын иһитиннэрдэ.
Устудьуоннар көспүттэрин кэннэ хас биирдии кэллиэс ноҕоруускатын көрүөхтэрин, ол түмүгүнэн эрэ преподавателлэрин үлэҕэ ылыахтарын эттэ.
Онтон номнуо төлөммүт харчыларын төнүннэрии туһунан ыйыппыттарыгар, Потребительскай кооперация Дьокуускайдааҕы атыы-экэнэмиическэй кэллиэһин тэрийэн таһаарааччытынан “Холбос” буоларын, онон бу боппуруоһу, төлөөбүттэрин быһыытынан “Холбостон” эбэтэр кэллиэстэн бэйэтиттэн туоһулаһалларыгар хоруйдаата.
Людмила ПОПОВА, “Саха сирэ” хаһыат, edersaas.ru