Потапов “Yurung Bizon” испэктээгэ быһа холбонуу ньыматынан көстүөҕэ...
Олох-дьаһах

Потапов “Yurung Bizon” испэктээгэ быһа холбонуу ньыматынан көстүөҕэ

Саха тыйаатыра Сергей Потапов саҥа туоруоруутун көрдөрүүгэ бэлэмнэнии үлэтин ыыта сылдьар. “Yurung Bizon” диэн ааттаах испэктээх премьерата бэс ыйын 15 күнүгэр, киэһээ 18.00 чааска анаммыт. Бу көстүү быһа холбонуу ньыматынан Инстаграм, Ютуб нөҥүө ыытыллыаҕа.

edersaas.ru

Испэктээх режиссера Сергей Потапов саҥа айымньытын туһунан маннык кэпсиир:

— Бу туруоруу Михаил Башкиров саҥа суруйбут пьесатыгар олоҕуран оҥоһулунна. Ис хоһоонун сүрүнэ миэхэ өр кэм устата баар этэ, ону Мишаҕа кэпсээбитим. Кини ол кэмҥэ Канадаҕа бара сылдьыбыта, онно индеецтар резервацияларыгар тиийэ сылдьыбыт этэ. Ол курдук индейскай тиэмэ күөрэйэн тахсыбыта. Испэктээк электрическэй олоппос нөҥүө өлөрүллэргэ уураахтаммыт эдэр дьахтар олоҕун тиһэх түгэннэрин туһунан.

Жанна Ксенофонтова толорор оруола олус уустук. Бу моноспектакль — биир эрэ киһи оонньуур туоруоруута. Ону таһынан, испэктээк устатын тухары кини биир олоппоско кэлгиллэн олорор, ол аата хамсаныы нөҥүө оруолу арыйыы эмиэ сатаммат. Онон аҥаардас тыл күүһүнэн бэйэтин оруолун, испэктээк устуоруйатын арыйыахтаах. Испэктээк 50 мүнүүтэ кэриҥэ буолуоҕа.

Бу сырыыга сүрүн күүспүн испэктээк туруоруллар ньыматыгар уурдум. Тоһоҕолоон этэбин — бу дьиҥнээх “онлайн”, эрдэ уһуллубут видеону көрдөрүү буолбатах. Көрөөччүлэр бу сырыыга ытыс таһыныытынан буолбакка, быһа холбонуу кэмигэр комментарий суруйан испэктээги кытта хардары хайсыахтарын сөп. Хомойуох иһин нууччалыы титрдары быһа биэрии кэмигэр холбуур ньыманы булбатыбыт, онон сахалыы саҥарар эрэ дьон премьераны өйдүүллэрэ буолуо.

Пандемия аҕалбыт саҥа кэм сокуоннарыгар сөп түбэһэн бары сайдыахтаахпыт. Ол иһигэр тыйаатырдар эмиэ. Мин санаабар, бу дьаҥ бүтэһик буолбата буолуо, онон үөрэниэх, уларыйыах тустаахпыт.

Саха тыйаатырын Ютуб ханаала, Инстаграма

Егор Карпов, «Саха сирэ» хаһыат, edersaas.ru

2
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

13 + тринадцать =