Саха сиригэр бэс ыйыгар 3-7 саастаах оҕолорго бэриллэр ыйдааҕы босуобуйаҕа анаан 324 мөлүйүөн солкуобай суумалаах үп көрүллүбүтэ. Ыйдааҕы тиийинэн олоруу кээмэйиттэн намыһах дохуоттаах ыаллар босуобуйаны ылан олороллор. Бэс ыйыгар барыта 30 тыһыынчаттан тахса сайаапка киирбитэ.
Бу босуобуйа бэриллэр буолла диэн быһаарыныы ылыллыбытын кэннэ, кэлэр ый 26 чыыһылатыгар диэри төлөнүөхтээх. Быһаарыныыны сайабылыанньаны биэрбит кэннэ, 20 күн иһигэр ылыналлар.
Сайабылыанньа “Госуслуги” порталга бэриллэр. Толорорго 18-гар диэри саастаах оҕолору барыларын ыйыллыахтаах. Ыйытыы үөскээтэҕинэ, 8-800-100-1403 нүөмэринэн, эбэтэр олорор сиргитигэр сыһыарыллыбыт социальнай управление нүөмэригэр эрийэн, билсиэххитин сөп.
“Госуслуги” порталга сайабылыанньаны хайдах биэриэххэ сөбүй?
1. Тус кэбиниэккитигэр киириҥ.
2. Портал сүрүн сирэйигэр “Популярное на портале” салааҕа төлөбүр туһунан суругу булуҥ.
3. Аллараа түһэн, “Подать заявление” диэни баттааҥ.
4. 1-кы, 2-с пууннарга дааннайдаргытын бэрэбиэркэлээҥ. Эппэкиин буоллаххытына, ону туоһулуур докумуону киллэрэҕит.
5. “Сведения об иных доходах” диэн 3-с пууҥҥа дохуот көрүҥүн уонна кээмэйин суруйаҕыт (алимент, оҕо босуобуйата, о.д.а.). Сүрүн дохуоккутун (хамнаскытын) суруйбаккыт.
6. 4-с пууҥҥа кэргэҥҥит уонна бары оҕолоргут тустарынан дааннайдары суруйаҕыт. Кими эрэ көтүппүт буоллаххытына, аккаас кэлиэн сөп.
7. 5-с пууҥҥа төлөбүрү хайдах ыларгыт табыгастааҕын туһунан суруйаҕыт:
— “Через кредитную организацию”: баан аатын суруйдахха, баан туһунан сибидиэнньэ бэйэтэ суруллар, расчетнай счет нүөмэрин эрэ суруйуохха наада.
— “Через почтовое отделение”: буоста нүөмэрин, аадырыһын, индексин суруйаҕыт.
Ангелина Васильева, «Саха сирэ» хаһыат, edersaas.ru
+1
+1
+1
+1
+1
+1
+1