Попова хаарчахтааһыны уһулар үс усулуобуйаны ааттаата.
Ыалдьыбыт дьон ахсаана күн аайы аччаан иһиитэ, сытар балыыһаларга куойкалар босхолонуулара уонна дьоҥҥо коронавируһу булууга тиэстэр ахсааннара – хаарчахтааһынтан тахсыы бастакы түһүмэҕин олоххо киллэриигэ үс сүрүн ирдэбил. Бу туһунан ТАСС-ка Роспотребнадзор баһылыга Анна Попова кэпсээтэ.
“Хаарчахтааһынтан тахсыыга бастакы киритиэрий – ыарыы тэтимэ аччааһына. Ону тэҥэ куойка-миэстэлэр кураанах туруулара, ыалдьыбыт дьону быһаарыыга тиэстэри ыытар кыах үөскээһинэ. Бу үс сүрүн көрдөбүл. Маны тэҥэ, эбии киритиэрийдэр эмиэ бааллар, ол иммунитекка сыһыаннаах, маныаха анал чинчийии ирдэнэр”, — диэтэ кини.
Арассыыйа санитарнай биэдэмистибэтин салайааччыта чопчу балаһыанньаттан тутулуктаах атын ирдэбиллэр баар буолуохтарын сөбүн аҕынна.
Бүгүн хас биирдии Арассыыйа олохтооҕун соруга – ыалдьыбат буолуу.
Кини ону сэргэ, нэһилиэнньэ дьиэттэн тахсыбакка олоруу эрэсиимиттэн тахсыытыгар 2-3 киһи буолан дьаарбайыы, уулуссаҕа физкультуранан дьарыктаныы, оҕолору күүлэйдэтии буолуон сөбүн ыйда. Ол эрээри, маныаха эмиэ социальнай тэйиччи туттуу тутуһуллуохтаах.
Светлана Ментюкова тиэкиһэ, “Российская газета” хаһыаттан
Бэлэмнээтэ Женни СТРЮКОВА.
Хаартыска: тустаах хаһыаттан