Нам улууһун Түбэтиттэн сылдьар эдэр урбаанньыт Николай Попов «Бастакы» ханаал ыытар «Поле чудес» биэриитигэр кытынна.
Николай билигин Москваҕа баар, биэрии номнуо уһуллан бүппүт. Кинини кытта бииргэ төрөөбүт быраата Дьокуускайдааҕы музыкальнай кэллиэс устудьуона Петр Попов барса сырытта.
Николайдыын төлөпүөнүнэн сибээстэһэ сырыттыбыт:
— Москваҕа 12-с чыыһылаҕа кэлбиппит, 13-скэ бэлэмнэнии буолбута, онтон уһуллубуппут. «Поле чудес» 30 сыллаах үбүлүөйдээх биэриитигэр кытынным. Маныаха саайтарыгар киирэн сайаапка толорон ыыппытым.
Саха сирин дьоһуннаахтык билиһиннэрдим дии санаатым. Быраатым Петя тойуктаан, сахалыы ыллаан иһитиннэрдэ. Олус сэргээтилэр, Саха сирин култууратын, олоҕун-дьаһаҕын интэриэһиргииллэр эбит. Биэриигэ биэс-алта чаас уһулуннубут быһыылаах, тэрээһин өттүттэн олус үрдүк таһымнаахтык ааста. Тэлэбиисэргэ ону биир чаас курдук быһан, таҥан көрдөрөллөр эбит. Коронавирус дьаҥынан сибээстээн, биэрии биир даҕаны көрөөччүтэ суох уһулунна.
Кыттааччылартан мин саамай эдэрдэрэ этим. Улаханнык долгуйбатаҕым. Биэрии ыытааччытыгар Леонид Якубовичка сахалыы бэлэхтэри илдьибитим: «Киэргэттэн» алмааһынан киэргэтиилээх харысхал, «Уус-Экспоттан» саха быһаҕа, Нам улууһуттан, Түбэ нэһилиэгиттэн сувенирдары, «Брусок» чааһынай мастарыскыайтан балык кыһар нобуор уо.д.а.
Сырыыбыт табылларыгар көмөлөспүт Нам улууһун, Түбэ нэһилиэгин дьаһалталарыгар, өйөөбүт «Киэргэ», «Уус-Экспо», «Брусок» тэрилтэлэргэ, Олоҥхо тыйаатырыгар улахан махталбытын тиэрдэбит.
Саха уолаттара кыттыылаах биэрии бу ый 23 күнүгэр «Бастакы» ханаалга көстүөҕэ.
Николай 2015 сыллаахха М.К. Аммосов аатынан Хотугулуу-Илиҥҥи федеральнай университет историческай факультетын бүтэрбитэ. Эрдэ «Саха сирэ» хаһыакка, edersaas.ru саайтка суруналыыстаабыта, оттон билигин дойдутугар — Нам Түбэтигэр туризмы сайыннарыыга, «Туйгун-тур» сынньалаҥ баазатын тэрийэн үлэлии-хамныы сылдьар.
Айтана Аммосова, edersaas.ru