Бу күннэргэ «Кыһын Саха сириттэн саҕаланар» кыһыҥҥы туризм бэстибээлин чэрчитинэн ыытыллар «Саха сирин амтана» гастрономическай тэрээһин экспертэрэ киин куорат 15 эрэстэрээнигэр сылдьан, бэйэ бородууксуйатыттан оҥоһуллубут бүлүүдэ амтанын, хаачыстыбатын уонна сервис бары көрүҥэ хайдах тутуһалларын сыаналыыллар.
edersaas.ru
Быйыл «Саха сирин амтана» гастрономическай бэстибээл бэһис төгүлүн ыытыллар. Бу кэм устатыгар событийнай туризм салаатыгар Бүтүн Арассыыйатааҕы «Russian Event Awards» Национальнай бириэмийэҕэ тиксэн, Гран-При хаһаайынынан буолбута. Бу суолталаах бириэмийэ, биллэн турар, хотугу норуоттар национальнай куукуналарын пропагандалыырга, Саха сирин киин куоратын Дьокуускай эрэстэрээннэрэ сайдыыларын саҥа саҕахтарыгар «күөх уоту» умаппыта. Онуоха Москваттан сылдьар туризм эйгэтин ааттаах-суоллаах экспердэрэ Геннадий Шаталов уонна Игорь Бухаров оруоллара сүҥкэн.
Кавказ уонна илиҥҥи норуоттар бүлүүдэлэрин астыыр «Понаехали» эрэстэрээн куорат киинигэр турар буолан, Саха сирин ыалдьыттара да, олохтоохтор да сөбүлээн сылдьаллар. Бу эрэстэрээн биир кэмҥэ 200 киһини көрсөр кыахтаах. «Саха сирин амтана» бэстибээл дьүүллүүр сүбэтин бастакынан «Понаехали» эрэстэрээн управляющайа Саргылаана Данилова көрүстэ. Эдэр кэлэктиип ох курдук оҥостон, бэлэмнэнэн, шеф-повар Алишер Нарматов астаабыт астарын билиһиннэрдэ.
Биллэн турар, бастакынан убаһа этиттэн оҥоһуллубут бүлүүдэлэр болҕомтону тартылар.
Муксуунтан оҥоһуллубут минньигэс бэйэлээх лууктаах «Индигирка» салаат остуолга эмиэ баар буола түстэ.
Сүөгэйгэ ытыйыллыбыт сугуннаах мусс амтана минньигэһэ дьикти!
Дьүүллүүр сүбэ экспертэрэ уопуттаах дьон диэх курдук, хас биирдии бүлүүдэни үөрэтэллэр, болҕомтолоохтук көрөллөр-истэллэр.
«Понаехали» эрэстэрээн управляющайа Саргылаана Данилова эрэстэрээнин үлэтин-хамнаһын билиһиннэриитин бэртээхэй эҕэрдэ сахалыы ырыанан доҕуһуоллаата.
— Биһиги эрэстэрээммит норуоттары түмэр киининэн буолар. Манна Саха сирин ыалдьыттара кэлэн ыалдьыттаан, аспытын-үөлбүтүн сөбүлээн бараллар, — диэн кэпсиир Саргылаана Максимовна.
Тэрээһин кэмитиэтин аатыттан Саха сирин ресторатордарын салайааччыта Татьяна Тымырова «Понаехали» эрэстэрээн үлэһиттэригэр «Саха сирин амтана» гастрономическай бэстибээлгэ көхтөөх кыттыыны ылбыттарыгар махтанан туран, ону бигэргэтэр сэртипикээт туттарда. Ахсынньы 10 күнүгэр «Понаехали» эрэстэрээн управляющайа Саргылаана Данилова Москваҕа Арассыыйа эрэстэрээннэрин куонкуруһун кыайыылааҕын быһыытынан «Пальмовая ветвь» диэн суолталаах бириэмийэни ыла барыаҕа. Онон эрэстэрээн хардыыта киэҥ, былаана далааһыннаах.
Эрэстэрээнтэн тахсаары туран, мин суруналыыс быһыытынан, биир интэриэһинэй өрүтү бэлиэтии көрдүм. Биир саамай көстүүлээх сиргэ сахалыы тыллаах сурунааллар сыталлар эбит! Саха сиригэр ыалдьыттыы кэлбит дьон да, олохтоохтор да эбиэттэрин, киэһээҥҥи аһылыктарын кэтэһэ олорон, сурунааллары арыйталыыр кыахтаахтара үчүгэйиэн…
Ити курдук, төрөөбүт дойдуларын куукунатын таһынан атын дойду национальнай бүлүүдэлэрин киэҥ араҥаҕа тарҕата, билиһиннэрэ олорор «Понаехали» эрэстэрээни «Саха сирин амтана» гастрономическай бэстибээл кыттыылаахтара бары да олус сөбүлээтибит.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа: ааптар түһэриилэрэ