Былырыын Полярник күнүгэр анаан Дьокуускай куорат 202-с микрооройуонугар төрдүс төгүлүн аһаҕас сөтүө күрэҕэ буолбута. Онно 15 киһи кыттыыны ылбыта.
edersaa.ru
Кинилэр ортолоругар өрөспүүбүлүкэ ыалдьыта, 2 төгүллээх аан дойду рекордсмена Александр Брылин уонна Арассыыйа экстремал-спортсмена, Саха сирин олохтооҕо Григорий Прокопчук кыттыыны ылбыттара.
Быйыл сыстыганнаах дьаҥ турбутунан сибээстээн, Полярник күнүгэр анаммыт бэһис үбүлүөйдээх экстремальнай сөтүө сабыылаах эрэсииминэн ыам ыйын 21 күнүгэр ыытылынна. Cөтүөҕэ сыстыганнаах дьаҥынан сибээстээн, бары санитарнай ирдэбили тутуһан, 13 киһи кыттыыны ылла.
«Саха сирин Арктиката” эригийиэннээҕи уопсастыбаннай тэрилтэ салайааччыта, Эргиэн промышленнай балаататын бэрэсидьиэнэ, Ил Түмэн дьокутаата Владимир Членов хорсун санаалаах «Саха моржтара» түмсүү кыттыылаахтарыгар санааларын күүһүн сөҕөн туран, Полярник күнүн ыытыыга өйөбүллэригэр махтанна.
Сөтүөҕэ кыттыбыт «моржтар» бары уопуттаах дьон, үгүстэрэ 20-30 сыл тымныыга ууга сөтүөлүүргэ эрчиллиилээх дьон.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА.