Полярник күнэ арктическай улуустары сомоҕолуур

Ааптар: 
Бөлөххө киир:

2015 с. “Саха сирин Арктиката” эрэгийиэннээҕи уопсастыбаннай түмсүү тэриллибитэ. Тэрилтэ салайааччыта – Эргиэн промышленнай балаататын бэрэсидьиэнэ, Ил Түмэн дьокутаата Владимир Членов.

edersaas.ru

2013 с. ыам ыйын  21 күнүгэр РФ Бэрэсидьиэнин 502 №-дээх  “Полярник күнүн туһунан” ыйааҕынан анал бэлиэ күн бэлиэтэнэр буолбута. 1937 с. бу күн «Северный полюс-1» («СП-1») диэн научнай-чинчийэр эспэдииссийэ бэйэтин үлэтин саҕалаабыт. Онон бу бырааһынньык Уһук Хотугу сиргэ уонна Арктикаҕа экстремальнай усулуобуйаҕа үлэлиир уонна олорор дьону чиэстиир соруктаах төрүттэммитэ.

2019 с. тохсунньуга Сомоҕолоһуу сылынан сибээстээн, 13 арктическай улуустар землячестволара уопсастыбаннай түмсүү тэриммиттэрэ. “Саха сирин Арктиката” эрэгийиэннээҕи уопсастыбаннай тэрилтэ толорооччу дириэктэрэ Владилена Абрамова иһитиннэрбитинэн, бу кэмтэн ыла “Саха сирин Арктиката” эрэгийиэннээҕи уопсастыбаннай тэрилтэни кытта ыкса сибээстээх үлэни ыытар.

Ол курдук, былырыын Пиэрибэй Маайга сэлэлээн хаамыыга 13 арктическай улуустар бэрэстэбиитэллэрэ  “Саха сирин Арктиката” эрэгийиэннээҕи уопсастыбаннай тэрилтэни кытта бииргэ кыттыбыттар. Быйыл саас арктическай улуустар Арктика күнүгэр анаммыт волейбол күрэхтэһиитин тэрийбиттэр.

Буолаары турар “Полярник күнүн” көрсө арктическай улуустары кытта “Саха сирин Арктиката” эрэгийиэннээҕи уопсастыбаннай тэрилтэ дьиэҕэ олоруу эрэсииминэн “Арктика эйгэтэ – оҕо хараҕынан” оҕо уруһуйун күрэһин уонна “Фокуска – Саха сирин Арктиката” диэн киинэ-хаартыска куонкурустарын ыытар. Уруһуй күрэһин түмүгэ —  ыам ыйын 25 күнүгэр, киинэ-хаартыска куонкуруһун түмүгэ — бэс ыйын 6 күнүгэр Эргиэн промышленнай балаататын саайтыгар уонна инстаграм-сирэйигэр тахсыахтара.

Былырыын Полярник күнүгэр анаан ыам ыйын 25 күнүгэр Дьокуускай куорат 202-с микрооройуонугар төрдүс төгүлүн  сөтүө аһаҕас күрэҕэ буолбута. Онно 15 киһи кыттыыны ылбыта. Кинилэр ортолоругар өрөспүүбүлүкэ ыалдьыта, 2 төгүллээх аан дойду рекордсмена Александр Брылин уонна Арассыыйа экстремал-спортсмена, Саха сирин олохтооҕо Григорий Прокопчук кыттыыны ылбыттара.

Быйыл сыстыганнаах дьаҥ турбутунан сибээстээн, Полярник күнүгэр анаммыт бэһис үбүлүөйдээх экстремальнай сөтүө сабыылаах эрэсииминэн ыам ыйын 21 күнүгэр ыытыллыаҕа.

 

Елена ПОТОЦКАЯ, “Саха сирэ” хаһыат, edersaas.ru

Хаартыска — интэриниэттэн.

+1
0
+1
0
+1
0
+1
0
+1
0
+1
0
+1
0