Дьаҥ саҥа көрүҥэ тарҕанар кэмигэр араас хааччахтыыр миэрэлэр бөҕөлөр ылылыннылар, сүбэ-ама бөҕө бэриллэр. Илиини суунартан саҕалаан таһырдьа тахсыбакка, дьиэҕэ бүгэн олоруҥ диэҥҥэ тиийэ.
Ону нэһилиэнньэ син кыалларынан толоро, тутуһа сатыыр курдук. Бүгүн икки сонуннаахпын.
Бастакыта. Уулуссаҕа сылдьааччылары ИДьМ сотрудниктара, быһата полиция үлэһиттэрэ бэрэбиэркэлииллэр диэбиттэрэ син ыраатан эрэр. Сорох киһи олох көрбөтүм диир, сорохтор хаама сылдьаллар этэ дииллэр.
Мин эмиэ полиция массыынатын көрөн ааһааччыбын. “Бэрэбиэркэлииллэрэ дуу, суоҕа дуу” – диэн санаа эмиэ киирэн ылааччы. Төһө да ыспыраапкалаах сырыттарбын, син биир бэрэбиэркэҕэ түбэһиэхпин олох баҕарбаппын. Дьэ, бүгүн түбэстим ээ. Санаабар кытыы уулуссанан хааман иһэр курдугум да, уун утары полиция икки үлэһитин көрсө түстүм. “Ил Дархан муус устар 17 күнүнээҕи Ыйааҕар олоҕуран, бэрэбиэркэлии сылдьабыт, таһырдьа туох сыаллаах сылдьаҕыный? – диэн ыйыттылар. Ыспыраапкабын биэрбиппин көрдүлэр. Ол да буоллар, “уведомление” кумааҕытын туттарабыт диэтилэр. Бэйэлэрин испииһэктэригэр ыспыраапкалаах диэн бэлиэтээтилэр. Ханан олороргун, ааккын-суолгун, төлөпүҥҥүн барытын суруналлар. “Баһаалыста, билэр дьоҥҥор эт, бэрэбиэркэ ыытыллар, таһырдьа тахсыбакка олордуннар”, — диэтилэр бэрэбиэркэлэрин түмүктүүллэригэр.
Онон, бука баһаалыста, дьиэттэн тахсыбакка, тулуйан олоро сатааҥ! Чэгиэн буолуҥ!
Иккиһэ. “Газпромбаан” баан килийиэннэргэ анаан бэртээхэй тэрили туруорбут. Киирэр ааҥҥа илиини дезинфекциялыыр тэрил туруорбуттар. Олус табыгастаах. Туппас оҕо курдук хаста даҕаны боруобалаан көрдүм. Оо, маннык тэриллэри бары бааннар (кирэдьиити төлүүрү хойутатымаары син-биир бааҥҥа кэлээччи үгүс), улахан ас-үөл маҕаһыыннара, балыыһалар туруораллара буоллар. Бэрт да буолуо эбит. Менеджер кыыс Москваттан ыыппыттара диир.
Женни СТРЮКОВА, “Саха сирэ” хаһыат, edersaas.ru