Бүгүн, алтынньы 22 күнүгэр, Дьокуускай куорат аэропордун оройуонугар баар Гагарин аатынан сквергэ полиция сөбө суох дьайыыларын утары пикет буолла.
Пикети тэрийээччи — гражданскай активист Эрэл Васильев. Бу эдэр киһи маннык ис хоһоонноох пикети тэрийбит төрүөтүнэн киин куоракка алтынньы 7 күнүгэр ыытыллыбыт Алексей Навальнайы өйүүр акцияҕа ХИФУ устудьуона 22 саастаах Вадим Васильев эмсэҕэлээбитэ буолар.
Санатар буоллахха, ол күн Доҕордоһуу болуоссатыгар буолбут акцияҕа, көҥүлэ суох ыытыллыбыт буолан, полицейскайдар онно кыттыбыт аҕыйах киһини тутан, полиция отделыгар илдьибиттэр.
Онно Васильев диэн устудьуон полиция үлэһиттэрин кытта быһаарса туран, маатыралаабыт, ыыс-бурут тылынан үөхсүбүт аҕыйах сөкүүндэлээх видеота социальнай уонна интэриниэт ситимнэринэн тарҕаммыта.
Ол кэнниттэн аны кинини полицейскайдар кырбааннар (сорох биэрсийэнэн, дубинканан охсон), хас да илин тииһэ суох хаалбыт диэн иһитиннэрии тарҕаммыта.
Ол кэнниттэн Дьокуускай полицията тарҕаппыт видеотугар сорох илин тиистэрэ чахчы суох, бэл диэтэр, айаҕар хааннаах Васильев полицейскай штативыгар бэйэтэ баран түһэн эчэйбитин, полицияҕа туох да претензията суоҕун туһунан эппитэ көстөр.
Онтон алтынньы 8 күнүгэр СӨ Ис дьыалаҕа министиэристибэтэ «Вадим Васильев эчэйиитигэр полицейскайдар сыһыаннара суох» диэн официальнай иһитиннэрии оҥорбута.
Оттон бүгүн опальнай Навальнайы өйүүр буолбакка, ол сокуоннайа суох акцияҕа кыттыбыттарын иһин тутуллубут дьону, чуолаан, полиция атаҕастаабыт устудьуонун өйүүр сыаллаах пикет буолла.
Пикет саҕаланыыта биир уол «полиция пришла нас задерживать или охранять нашу безопасность?» дии-дии ааста. «Тоҕо кэллэ кэлээт, итинник диигин, провокациялыыгын?» диэн ыйыппыппар, саҥарбата. Пикеккэ да кыттыбата, туора турда.
Пикеккэ «Я сам себе закон», «Да у тебя права человека просрочены», «Никто его не бил» диэн тыллардаах былакааттардаах үс эрэ киһи кытынна. Чочумча буолан баран, төрдүс киһи кэлэн кыттыста. Суруналыыстар уонна полиция үлэһиттэрэ ордук элбэхтэр.
Биһиги корр., «Саха сирэ» хаһыат, edersaas.ru
Ааптар түһэриилэрэ.