Ис дьыала уорганнарын үлэһиттэригэр аанньа ахтыбаттык сыһыаннаһыы, сэнээһин, итирэн баран өрөлөһүү, ону ааһан, күүһү туттуу дөрүн-дөрүн тахса турар. Оттон ити — буруйу оҥоруу эбээт!
Вера МАКАРОВА, «Саха сирэ» хаһыат, edersaas.ru
Сунтаар улууһугар биир оннук эдэр киһиэхэ суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, бу дьыл кулун тутар ыйыгар 21 саастаах уол олохтоох полиция отделыгар дьуһуурунай чаас көрүдүөрүгэр туран, административнай боротокуол толоро олорор полицейскайы төбөтүнэн сирэйгэ саайан, муннун тоһуппут.
Бу эдэр киһи ити иннинэ эмиэ буруйу оҥорон, усулуобунай миэрэнэн сууттаммыт эбит.
Ол тургутар болдьоҕо бүтэ илигинэ ити хаттаан буруй оҥорон, буолаары буолан, полицейскайга күүһү туттан, күлүүстээх хаайыыга көҥүлэ быһылынна.
Суут кинини РФ Холуобунай кодексатын 318-с ыст. 2-с чааһынан, ол эбэтэр, былаас бэрэстэбиитэлэ дуоһунаһын эбээһинэһин толорорунан сибээстээн, кини доруобуйатыгар кутталлаах күүһү туттууга буруйдааҕынан билинэн, 5 сылга уопсай режимнээх көҥүлүн быһарга уурбут.
Бириигэбэр сокуоннай күүһүгэр киирэ илик.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.