Дьокуускай куоракка ыам ыйын 28 күнэ үүнэр түүнүгэр итирик саха уолаттара ГИБДД иниспиэктэрдэригэр утарылаһан, охсуһа-кырбыы сатаабыттара видеоҕа уһуллан, интэриниэккэ тарҕанна.
Вера МАКАРОВА, «Саха сирэ» хаһыат, edersaas.ru
Полицейскайдар Жорницкай уулуссатыгар буолбут суол быһылаанын туһунан иһитиннэрии киирбитин бэрэбиэркэлии кэлбиттэр. Онуоха өрүкүйбүт итирик уолаттар кинилэргэ өрөлөһөллөрүн ааһан, ыыс-бурут тылларынан үөхсэ-үөхсэ, охсо-кырбыы сатыыллара көстөр. Итирдэр утаҕы хото иһэн, мэйиилэрэ туймаарыйбыт, кыыллара турбут уолаттары тохтотоору, иниспиэктэрдэр күүһү тутталлар, онтон биирдэстэрэ бэстилиэтинэн салгыҥҥа биирдэ ытар. Силиэстийэ уорганнара билигин бу чахчынан процессуальнай бэрэбиэркэ ыыталлар.
Оттон Дьокуускай куоракка уонна Өймөкөөн улууһугар итинник буруйу оҥорбут гражданнарга суут уураахтара таҕыстылар.
2016 сыл ахсынньы ыйыгар киин куорат биир дьиэтигэр охсуһуу буола турарын туһунан тыллабыр полиция дьуһуурунай чааһыгар киирбит. Ол иһитиннэриини бэрэбиэркэлии, ыйыллыбыт аадырыска патруллуур-постовой сулууспа (ППС) полицейскайдара тиийбиттэр.
Онно боротокуол толорор кэмнэригэр дьиэлээх хаһаайын быһаҕы бэйэтин моонньугар тирээбит, полицейскайга суоһурҕаммыт. Онтон полицейскай диэки быһаҕын туппутунан икки төгүл дьүккүс гыммыт.
31 саастаах сууттанааччы буруйун билинэн, кини дьыалата ураты бэрээдэгинэн көрүллүбүт.
Суут кинини РФ Холуобунай кодексатын 318-с ыст. 1 чааһынан, ол эбэтэр, былаас бэрэстэбиитэлэ дуоһунаһын эбээһинэһин толорор кэмигэр күүһү туттарынан суоһурҕаныы иһин буруйдааҕынан билинэн, 2 сыл усулуобунай миэрэнэн накаастаата.
Оттон Өймөкөөн улууһугар 38 саастаах киһи бу дьыл кулун тутар ыйыгар полицейскайы штанганан төбөҕө охсон, мэйиитин доргутан, сууттанна. Бу киһийдэх суут уурааҕынан, 3 сыл 6 ыйга усулуобунай миэрэнэн накаастанна.
Полиция үлэһиттэригэр өрөлөһүү, үөҕүү, күүһү туттарынан суоһурҕаныы уонна күүһү туттуу иһин холуобунай эппиэтинэс баарын умнумаҥ!
Вера МАКАРОВА, «Саха сирэ» хаһыат, edersaas.ru
Хаартыска уонна видео: интернеттэн.