Соторутааҕыта Хаҥалас улууһун Мохсоҕоллоох бөһүөлэгэр 56 кыбартыыралаах дьиэҕэ баһаар буолбут.
Баһаар буолбутун туһунан иһитиннэрии Хаҥалас улууһун полициятыгар күнүс 12.30 мүн. киирбит. Итинэн сибээстээн, отдел личнэй састаабыгар бүтүннүү түрүлүөн биллэриллибит.
Быһылаан сиригэр тиийбит полицейскайдар дьиэ түөрт подъеһыгар баар кыбартыыралартан олохтоохтору тута таһаартаан барбыттар.
Уот турбут подъеһыгар участковай боломуочунай, полиция младшай лейтенана Эдуард Тимофеев уонна участковай көмөлөһөөччүтэ, полиция старшай сержана Станислав Филиппов киирбиттэр.
Полицейскайдар баһаарынайдарга маҥнайгы этээскэ умайа турар кыбартыыраларга киирэллэригэр көмөлөспүттэр. Подъезка номнуо хойуу буруо сабардаабыт.
Ити кэмҥэ үөһээҥҥи этээстэргэ дьахтар көмөҕө ыҥырар хаһыыта иһиллибит. Тимофеевтаах Филиппов онно ыстаммыттар. Буруо олус хойдубутуттан 58 саастаах дьахтар кыбартыыратыттан кыайан тахсыбакка турар эбит.
Полицейскайдар кыбартыыралары барытын тоҥсуйталаан, пенсионерканы таһынан, 9 саастаах уолу уонна 18 саастаах кыыһы таһаартаабыттар.
Уопсайа ити Соколинай уулуссаҕа турар дьиэттэн 26 киһи, ол иһигэр 11 оҕо эвакуацияламмыттар. Түөрт оҕо үгээрдээбит. Дьолго, ыараханнык эмсэҕэлээбит киһи суох.
Олохтоохтор уонна Мохсоҕоллоох бөһүөлэгин дьаһалтата полицейскайдарга истиҥник махтаналларын биллэрбиттэр.
Полиция младшай лейтенана Эдуард Ильич Тимофеев ис дьыала уорганнарыгар сулууспалаабыта 10 сыл буолбут, участковай дуоһунаһыгар 2018 сыл алтынньытыттан анаммыт.
Полиция старшай сержана Станислав Сергеевич Филиппов ис дьыала уорганнарыгар бу дуоһунаһыгар 2013 сыл ахсынньытыттан сулууспалыыр.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн