Сунтаар сэлиэнньэтигэр полиция үлэһитэ баһаартан дьону быыһаабытын туһунан сонуну РФ ИДьМ-тын официальнай бэрэстэбиитэлэ Ирина Волк иһитиннэрбит.
Сунтаар улууһун полициятыгар бэс ыйын 4 күнэ үүнэр түүнүгэр хас да кыбартыыралаах мас дьиэ умайан эрэрин туһунан иһитиннэрии киирбит. Быһылаан сиригэр оперативнай дьуһуурунай көмөлөһөөччүтэ Афанасий Кутанов уонна тас тэрилтэлэри харабыллыыр отдел полицейскайдара барбыттар.
Онно тиийэн, уокка былдьаммыт кыбартыыраҕа ким да олорботун быһаарбыттар. Ол эрэн, полицейскайдартан биирдэстэрэ аттынааҕы кыбартыыраҕа элбэх оҕолоох ыал баарын билэр эбит.
Полицейскай Кутанов ол кыбартыыра аанын алдьатан киирбитэ — хойуу буруо дьиэни биир гына ылан, уот ыраатан эрэр эбит. 10 саастаах игирэлэр — Эрхан уонна Дархан, 7 саастаах балтылара Ангелина номнуо буруоҕа тумнастыбыттарын, полицейскай көтөҕөн таһаартаабыт, онтон төрөппүттэригэр көмөлөспүт. Уот түүн, дьон утуйа сыттаҕына, турбут.
Баһаарынайдар кэлиэхтэригэр диэри полицейскайдар туох баарынан уоту умуллара сатаабыттар.
Афанасий Кутанов бу бастакы хорсун быһыыта буолбатах, өссө 2010 сыллаахха аана хатааһыннаах дьиэҕэ уот туран эрдэҕинэ, 7 саастаах кыыс оҕону быыһаан турардаах.
Вера МАКАРОВА, «Саха сирэ» хаһыат, edersaas.ru
Хаартыска: ЯСИА.