“Якутия” Урутаан сайдыы территориятын резиденэ пеноплаһы иккистээн туһаҕа таһаарар салаатын үлэҕэ киллэрдэ. Бу производственнай салаа туһаныллыбыт матырыйаалтан полистирол блоктарын саҥаттан оҥорор кыахтаах. Бу бырайыагы олоххо киллэрбит «Теплый край» собуот эрдэ сендвич панеллары оҥорон таһаарыынан дьарыктанар этэ. Саҥа үлэлиир тэрил бөҕө суох үлэ өссө биир таһымыгар таһаарда.
«Теплый край» тэрилтэ салайааччыта Ньургустаан Иванов этэринэн, саҥа тэрил үлэтэ судургу:
— Илдьиритэр массыына полистирол гранулаларын алдьаппакка эрэ бэйэ бэйэлэриттэн араарар, ол кэннэ саҥаттаан блок оҥоруохха сөп буолар. Үлэ үс түһүмэх массыыналартан турар — илдьиритэр, хомуйар уонна саҥа быһыы биэрэр халыыптан.
8 чаастаах үлэ күнүгэр оҥорон таһаарар салаа 50 кубометр бородууксуйаны оҥорор кыахтаах. Маҥнайгы кэмҥэ тэрилтэ бэйэтин бөххө тахсар матырыйаалын сөргүтүөҕэ, кэнники атын тэрилтэлэртэн матырыйаалы тутар былааннаах.
Сендвич панеллары оҥорор собуот “Якутия” ТОР иһигэр 2017 сылтан үлэлээн барбыта. «Теплый край» Сайдыы корпорациятын кытта түһэрсибит сөбүлэҥинэн бырайыакка 35 мөлүйүөн солкуобай чааһынай хапытаалы киллэриэхтээх этэ. Тэрилтэ бэйэтин эбэһээтэлистибэтин аһары толорбута – уопсайа чааһынай инвестиялар 52 мөлүйүөн солкуобай кэриҥэ буолбуттара.
«Саха сирэ» хаһыат, edersaas.ru
Хаартыска sakha.gov.ru