Ил Дархан Айсен Николаев этиитин үгүс киһи үлэлиир эйгэтин кытта ыкса сибээстээн иһиттэ.
edersaas.ru
Ол курдук, Нам улууһун Партизан нэһилиэгин баһылыгын солбуйааччы Полина Скрябина Анал этиигэ баһылыктары быыбардааһыҥҥа, олохтоох салайыныыга, дьокутааттар үлэлэригэр сыһыаннааҕы бэлиэтээтэ:
— Өрөспүүбүлүкэ Аҕа баһылыгар Айсен Николаевка улуус баһылыктарын быыбардаан талан буолбакка, аныыр туһунан этиилэр киирэллэр эбит. Онуоха Ил Дархан быыбар лиидэрдэри «сиидэлээн» таһаарарын тоһоҕолоон эттэ уонна ол талыллыбыт дьон улуус олохтоохторугар аптарытыаттара улахан суолталааҕын бэлиэтээтэ. Кырдьык, баһылыктары быыбарынан талар ордук. Олох да ону көрдөрөр. Элбэх үлэнэн, үгүс сыранан баһылык буолбут киһи хас биирдии дьайыытын хонтуруолланар, дьон этиитигэр эппиэтинэстээхтик сыһыаннаһар буолла.
Онтон улуус уонна оройуон киинин дьаһалталарын холбооһун туһунан этиитин кытта сөпсөспөппүн. Баҕар, ити холобурдаммыт Аллайыаха курдук аҕыйах нэһилиэнньэлээх хоту улуустарга ити көрүҥ сөптөөҕө буолуо. Ол эрээри элбэх нэһилиэнньэлээх киин улуустарга итинник холбооһун дуу, бөдөҥсүтүү дуу барсыбат.
Ил Түмэн дьокутааттара олохтоох муниципальнай былаастар дьокутааттарын кытта сокуоннары көҕүлээһиҥҥэ биир хайысхалаахтык, биир кэлимник үлэлииллэригэр ыйбытын сонуннук ылынным. Кырдьык, Ил Түмэн дьокутаата норуокка чугаһыан наада. Оттон ол оннук «далаһанан» улуус дьокутааттара буолар буоллахтара.
Онон Ил Дархан Айсен Николаев үрдүкү уонна олохтоох былаас уорганнарыгар туһаайан сонун этиитин кэлэр сылга дьокутааттар икки өрүттэрэ олохтоохтук ырытан, толкуйдаан, олоххо киллэрэллэригэр эрэнэбин.
Елена ПОТОЦКАЯ, «Саха сирэ» хаһыат, edersaas.ru