Полина-Победа «Тэтимнэр» нэдиэлэтээҕи сонуннарынан саҥа хоһоонноро
«ТЭТИМ» араадьыйа эрэллээх истээччитэ Полина Находкина нэдиэлэтээҕи «Тэтимнэр» сонуннарын түмэн, хоһоонугар холбоон суруйбутун бэчээккэ таһаарабыт.
edersaas.ru
ОҔО КҮНЭ
Оҕо күнэ! Ийэ дьоло!
Аҕа сэмээр үөрэр күнэ!
Уруу утум салҕанар
Кэскил күнэ бу бүгүн!
Эбээ буолбут күнүм бүгүн!
Дьылҕам бэлэх биэрбит күнэ!
Киһи аайы тиксибэт
Айыыларым бэлэҕэ!
Сиэним миэнэ уолум уола
Эдэр сааспын санатта,
Бүгүн санаам тиийбэт сирэ
Элэҥнээтэ харахпар.
Киһи эрэ үөрэр күнэ
Сырдык санаа кыната!
Оҕо күлэр, оҕо ытыыр
Дьиэтэ өрүү ДЬОЛ дьиэтэ!
20.11.2020с.
УОЛ ОҔО КҮНҮНЭН
Саҥа күн күннэтэ
Саҥалыы саҕыллар,
Күн аайы кэһиилээх:
Бу бүгүн УОЛ күнэ!
Биэс тарбах кэриэтэ
Сиэн уолум бэһиэлэр,
Олоҕу чуҥкуппат
Бэһиэлэй эрэттэр.
Мас кыстыы, хаар күрдьэ
Таһырдьа ойоллор.
Кыракый сайыһан
Сарылыы хаалаахтыыр.
Сүүрэллэр-көтөллөр
Сүрэҕи сымната,
Моторус-итэрис
Тус-туспа көстүүлэр.
Кырдьартан сынтайбат
Тирэҕим буолаллар,
Олоҕум ситимин
Биэс сиэним салҕыаҕа.
22.11.2020
ОЛЬГА-ОЛЬГА
Ольга саха дьонугар
Сулус буолан тыкпыта,
Саха ыалын аайытын
Күндү ыалдьыт буолбута.
Араадьыйа долгуна
Ыаллар аайы баар этэ,
Ольга кэрэ куолаһа
Угуйара кэрэҕэ.
Амма сирэ билинэр
Кэрэлэртэн биирдэрэ
Ольга буолар буоларын
Күүскэ ааттыыр киэн тутта.
Амма дьиҥнээх символа
Үйэлэргэ ааттаныа!
Олох баарын тухары
Ырыалара ылланыа!
23.11.2020с.
ДЬАХТАРЫ ХАРЫСТААҤ
Дьахтартан дьолломмут эр киһи
Толору дьол диэни амсайар,
Олоххо, үлэҕэ ситиһии
Ол онтон буоларын билинэр.
«Коль жена хорошая — хорошо живём»-
Суруйан турардаах Гамзатов.
Дьахтары үөҕэртэн, сэнииртэн
Кэлэйэр эр киһи кэскилэ.
Таптыыртан, хайгыыртан хас дьахтар
Туруга тупсуоҕа, уоскуйуо.
Харыстааҥ дьахтары, ойоҕу
Дьахтар диэн дьол-үөрүү биһигэ.
25.11.2020
МЭҤЭ ТААС
Дойдубут киинигэр
Дьокуускай куоракка
Сметанин аатынан
Уулусса ааттанна.
Ааттанна Түмэпий
Буойуммут! Бэйээппит!
Үйэҕэ өйдөбүл
Мэҥэ Таас кылбаарда!
Хоһоонун тыллара,
Суругун сорҕото,
Сүрэҕин төлөнө
Иҥнилэр ол Тааска.
Киэн тутун, Кэбээйи,
Бу чулуу уолгунан!
Ол кылгас олохтон
Уһун суол субуллуо!..
28.11.2020с.
СЭРГЭСТИИ ХААМСЫАХХА
Бүппүтүн, барбытын кэнниттэн
Үтүө тыл үрдэ суох этиллэр
Кэпсиибит, хайгыыбыт, ахтабыт,
Кинигэ таһаара сырсабыт.
Ол тылтан саатар дуу сорҕотун
Тыыннааҕар эппиппит буолуо дуу?
Барары-кэлэри тохтотон
Биир күнү анаабыт этибиэт?
Төрүөхтэн күннэтэ ийэбит
Аттыга баарыгар үөрэнэн
Аахайбат буоларбыт буолуо дуу
Этэрин, кэпсиирин, таптыырын(?)
Бэйэбит «таптыыбын» диэн тылы
Ийэҕэ этэри тумнабыт,
Ити тыл булгуччу атыҥҥа
Ананар курдуктуу туттабыт.
Сааһырбыт сүрэҕин сымната
Сэргэстии хаамсыахха кинилиин,
Кырдьыбыт кэмнэрин чэпчэтэ
Тыыннааҕар сылаас тыл этиэххэ.
Полина-Победа
Уус Алдан
29.11.2020с.