Полина-Победа: «Суоппар күнүгэр»

Бөлөххө киир:

Оскуоланы бүтэрэн баран мин «суоппар буолуом» диэбиппэр ийэм ситэ саҥардыбатаҕа даҕаны:»Үс уолум суоппар, аны эн буоларыҥ итэҕэс»- диэбитэ.

edersaas.ru, Полина-Победа

Биир сыл тыа сиригэр үлэлээн уоппускабар Омскай куоракка немка дьүөгэбэр күүлэйдии тиийэн устунан үлэҕэ киирэн хаалбытым. Биир дьыл троллейбус ыытааччы үөрэҕэр киирээри гыммытым уҥуоҕум ирдиир 150 см тиийбэккэ сыыйыллыбытым.
Кэлин миигиттэн 9 сыл балыс балтым тиийэн трамвай ыытааччы буолбута. Биирдэ дьээбэҕэ айанныыр маршрутугар киирэн айаннаабытым. Трамвай иһэ «Дядя Стёпа» хоһооҥҥо курдук оргуйан олорор этэ. Пассажирдар соһуйуу-өмүрүү:»Да вы только посмотрите кого посадили на место водителя? Совсем школьницу посадили! Кто её только допустил туда?». Өрө хаама сылдьан таас нөҥүө кабина иһин өҥөҥнөһүү. Балтым буоллар бэрт чобуотук трамвай тохтобулларын ааттарын оҕотук нарын куолаһынан биллэрэн холкутук айаннаан иһэрэ. Мин киниэхэ мэһэй буолумаары биллибэккэ трамвайтан тахсыбытым. Оччолорго мөлүйүөн кэриҥэ  киһилээх Омскай куоракка кып-кыра, хап-хатыҥыр саха кыыһа күҥҥэ төһө тыһыынча киһини таспыта буолуой? Уруку да кэмнэргэ саха ыччата россия улахан куораттарыгар тиийэн араас эйгэҕэ этэҥҥэ үлэлииллэр этэ.
Суоппар күнэ онон биһиги аймахха балачча суолталаах. Техника араас көрүҥүн уруулугар олорооччуларга барыларыгар истиҥ эҕэрдэ!
Куттала суох суолу, сымнаҕас айаны барыгытыгар баҕарабын!

СУОППАР

Суһал айан наадатын
Суоппар киһи быһаарар,
Түүнү-күнү билиммэт
Тимир көлө тирилэс.

Уҥа-хаҥвс кэбэҕэс
Барааҥкатын эрийэр,
Көлүөһэтэ эргийэн
Көстөөх сири тулуппат.

Уһун айан аргыстаах —
Олор айан киһитэ,
Тиийэр сиргэр суһаллык
Тиэрдиэ суоппар эйигин.

Ыарыйдахха даҕаны
Суоппар киһи наадалаах,
Суолга сатыы бардахха
Кини ситэн олордуо.

Тэстибэтин көлүөһэҥ,
Бүппэт буоллун бензиниҥ,
Светофор күөх уота
Мэлдьи суолгар сыдьаайдын.

Суоппар-суоппар мичээрдээ
Эдэр, эмэн киһиэхэ,
Суолгар мэлдьи дьоллоохтук
Айан суолун тэлэ тур!

Полина-Победа,
Уус Алдан

+1
1
+1
0
+1
0
+1
0
+1
0
+1
0
+1
0