Тыа хаһаайыстыбатын күнүнэн үүтү-эти дэлэтээччилэргэ бука барыгытыгар итии-истиҥ эҕэрдэ! Уруку көлүөнэ дьоно бүгүн урукку кэмнэри, сайылыгы, ыччат ферматын санаан ааһара чуолкай.
edersaas.ru, Полина-Победа
Киһи барыта мөхпөт ол кэми, үгүс киһи эдэр сааһын сибээстээн үтүө кэмнэр бааллар этэ диэн сылаанньыйа санаан ааһыа.
Киһи хайа да кэмҥэ, ханнык да үлэ эйгэтигэр үтүөтүк сылдьыбыт буоллаҕына ол кэмин сааһыран да олорон олус истиҥник, сылаастык саныыр айылгылаах.
Доруобай буолуҥ бары, остуолгутугар тыа сирин аһа өрүү баар буоллун.
САЙЫЛЫК
Сайылыкка сайынын
Баара ыччат фермата,
Күммүт онно эрдэлээн
Көмүс дуйа тахсара.
Биэдэрэлээх кыргыттар
Титииктэргэ тиийэннэр
Һайдаан-ыллаан, ынах ыан
Үүнэр этэ саҥа күн.
Үүтү тиэйэ эдэр уол
Массыыната кэлэрэ,
Кэрэ кыыһы күннэтэ
Кэтии көрө таптыыра.
Мотуор тыаһа тирилэс
Сүрэх тыаһын баһыйар,
Кыыспыт бука таайара
Имэ кыыһа кэйэрэ.
Киэһэ буола түһээтин
Олох кыынньа түһэрэ,
Кыайан турбат сарсыарда
Умнуллара дьэ тута.
Матасыыкыл, волейбол
Күлүү-салыы, тыытыһыы
Хатыҥ чараҥ быыһынан
Кистээн-кистээн сиэттиһии.
Сайылыкка сайынын
Ферма баара сэргэх сир,
Сыбаайбаһыт дьэ онтон
Күһүн элбиир буолара.
Оҕо-уруу, сиэннэр диэн
Силис тардан ууһааннар,
Сайылыктан саҕыллан
Сайдам ыаллар билигин.
Полина-Победа
Уус Алдан
11.10.2020с.