Полина Победа: «Сааскы бастакы күнүнэн!»

Бөлөххө киир:

Хоһоонньут Полина Победа edersaas.ru саайт ааҕааччыларыгар саас бастаҥы күнүнэн истиҥ эҕэрдэтин ыытар. «Унньуктаах уһун кыһын кэнниттэн сүрэхтэргэ сырдык санаа салалыннын, туруккутугар эрчимҥит эбилиннин! Дьоллоох буолуҥ, доҕордоох буолуҥ, поэзияҕа чугас буолуҥ!» — диэн баҕа санаатын тиэрдэр.

ЭН ААККЫН ЫҤЫРАН…

Сулуһу бэлэхтиэх буолбатым
Ол бэлэх буолбатах, билэҕин.
Ылбыккын сүрэхпин билиэҥҥэ,
Онтугум бэйэбэр соҕотох.

Халлааҥҥа соҕотох сулустуун
Хаһан да кэпсэтэр буолбатым,
Ханыылыы көрбөтүм бэйэбэр
Сүрэхпэр эн бааргын — иккиэбит.

Эн ааккын ыҥыран кыйдаатым
Олохпор көрсүһэр ыардарбын,
Эн ааккын ыҥыран билигин
Кырдьары кыйдаһа сатыыбын.

КЫРДЬАР СААС

Бастакы хаһыҥын түһэрэн
Кырдьар саас ыалдьыттыыр миэхэҕэ,
Билиммэт ол ону мин дууһам —
Санаабар өссө да эдэрбин.

Өссө да күлэбин, үөрэбин,
Үҥкүүгэ да барыах курдукпун,
Өссө да эйиигин көрдөрбүн
Тапталы билиниэх курдукпун.

Оо тоҕо түргэнэй ааспыта
Эриэкэс эдэркээн кэмнэрим?
Оо тоҕо кырдьар саас дьиэм аанын
Тоҥсуура суох аһан киирэрий?

Тохтуу түс, кырдьар саас, ыксаама
Кырыаҕын баттахпар тамнаама,
Тоҥхойо кырдьарбын санатан
Мин чуумпу түүннэрбин аймаама.

КЭРЭНИ КЭРЭХСИЭХ

Букатын кэлбит диэн манна суох,
Букатын барар диэн мантан баар.
Орто сир олоҕо кээмэйдээх,
Дьылҕабыт кэхтэрэ биир күннээх.

Хаамарбыт, кэпсиирбит, толкуйбут
Олохпут оҥкулун оҥорор,
Биир хардыы, биир этии ардыгар
Быһаарар инники кэскили.

Кэлтэйдии көрдөһөн, ааттаһан
Саастарбыт үтүөтэ ааһаарай?
Сүүс доҕор ордугун эрэнэн
Биир үтүө доҕорбут куотаарай?

Олоҕу сөбүнэн сыаналаан
Оҥостуох, олоруох сиэрдээхтик,
Киһиттэн үтүөтүн сиидэлээн
Кэрэни кэрэхсиэх, сэҥээриэх.

КҮҮППҮТҮМ

Үөрэнэ киирэрбин күүппүтүм —
Умнууга хаалбыта ол кэмим,
Оскуола бүтэрин күүппүтүм —
Ханан да ааспыта биллибэт.

Үлэһит буоларбын күүппүтүм —
Пенсия ананта ыраатта,
Тапталы көрсөрбүн күүппүтүм-
Аймаата олохпун бүтүннүү.

Хаһан да күүппэтэх эбиппин
Хаар маҥан баттахтаах буолуохпун,
Ол эрэн олоҕум түмүгэ
Булгуччу ол онон бүтүөҕэ.

Кырдьары, бүтэри-оһору
Күүппүтү билбэппин бу сиргэ,
Ол эрэн күннээҕи олоххо
Ол көстүү көстөрө үксээтэ.

Күүппүппүт ааһара түргэниэн!
Күүппэппит көстөрө үгүһүөн!
Ол аата дьол диэммит ЧЫПЧЫЛҔАН!
Олохпут бүттүүнэ ЧАҔЫЛҔАН!

ЫАРАХАН ДЬАХТАР

Ыарахан дьахтары көрдөрбүн
Сөҕөрүм күннэтэ күүһүрэр:
Олохпут ыардарын аахпатын,
Сарсыҥҥы күнүгэр эрэлин.

Ыарахан дьахтары көрдөрбүн
Испэр мин аһына саныыбын:
Тоҕус ый иһигэр көтөҕүөн,
Олоҕун устата бүөбэйдиэн.

Ыарахан дьахтары көрдөрбүн
Дьиктитик уоскуйан ылабын:
Ол аата таптал баар олоххо,
Ол аата олохпут салҕанар.

Уус Алдантан Полина-Победа.

Хаартыска: сезоны-года.рф

+1
0
+1
0
+1
0
+1
0
+1
0
+1
0
+1
0